U Bushinwa bwiyemeje gutanga inkingo miliyoni 10 za Covid-19 muri gahunda ya COVAX

Yanditswe na Ntabareshya Jean de Dieu
Kuya 7 Gashyantare 2021 saa 08:06
Yasuwe :
0 0

U Bushinwa bwatangaje ko bwiteguye gutanga inkingo miliyoni 10 muri gahunda ya Covax igamije kugeza inkingo za Coronavirus kuri bose.

Icyo gihugu cyatangaje ko ariwo musanzu wacyo mu rwego rwo guharanira gukingira abantu benshi mu bihugu bikize no mu bihugu bikiri mu nzira y’amajyambere harimo n’ibihugu bya Afurika.

Umuvugizi wa Minisiteri y’Ububanyi n’amahanga y’u Bushinwa, Wang Wenbin yatangaje ko hashize iminsi ibihugu bikennye byinubira kuba inkingo za Coronavirus ziharirwa n’ibihugu bikize, bityo bakaba bashaka gutanga umusanzu kugira n’abatuye mu bihugu bikennye bagerweho n’inkingo.

Wenbin ntabwo yatangaje ubwoko bw’urukingo rwa Coronavirus igihugu cye kizatanga nk’inkunga.

Hari abafashe ubu buryo u Bushinwa bushaka gukoresha nk’ubugamije kugaragaza neza isura yabwo mu ruhando mpuzamahanga, nyuma y’uko icyo gihugu gishinjwe uburangare no kwimana amakuru bigatuma icyorezo cya Coronavirus gisakara ku isi.

U Bushinwa bufite sosiyete zitandukanye ziri gukora inkingo za Coronavirus zirimo Sinopharm, Sinovac, na CanSino.

Gahunda ya Covax igamije gutanga byibuze inkingo zingana na miliyari ebyiri, mu rwego rwo gufasha ibihugu bifite amikoro make kubona inkingo no kubasha gukingira abakora muri serivisi z’ubuzima n’abandi bakeneye guhabwa inkingo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .