00:00:00 IGIHE NETWORK KN KINYARWANDA EN ENGLISH FR FRANCAIS

U Bushinwa bwikomye Amerika ishaka kubusebya ku nkomoko y’icyorezo cya Covid-19

Yanditswe na Muhonzire Sylvine
Kuya 28 Gicurasi 2021 saa 07:42
Yasuwe :
0 0

U Bushinwa bwarakajwe bikomeye n’icyemezo cya Perezida wa Leta Zunze Ubumwe za Amerika, Joe Biden, cyo gukora ubundi bushakashatsi bwimbitse ku mvano ya Coronavirus mu Mujyi wa Wuhan wo mu Bushinwa, kuko hari amakuru avuga ko iyi virus yaba yaraturutse ku mpanuka yo muri Laboratoire mu mujyi wa Wuhan.

Muri Werurwe uyu mwaka nibwo hasohotse raporo y’ubushakashatsi bwakozwe n’Ishami ry’Umuryango w’Abibumbye ryita ku Buzima, OMS, igaragaza ko nta kintu na kimwe cyerekana ko Covid-19 yavuye muri Laboratoire.

Ibi byavugishije benshi ndetse ibihugu bimwe birimo na Amerika bitangira gushidikanya kuri ubu bushakashatsi, bivuga ko butabaye mu mucyo.

Biden byamwanze mu nda arashyira aratobora kuri uyu wa Kane tariki 27 Gicurasi, atangaza ko mu minsi 90 gusa azaba asohoye ibyavuye mu bundi bushakashatsi bwa nyabwo ku mvano ya Coronavirus, buzakorwa n’Abanyamerika bakora mu nzego z’ubutasi.

Amerika yasabye OMS ko ubu bushakashatsi bwa kabiri bwakorwa n’inzobere kandi zigenga, zigahabwa uberenganzira ku makuru yose afitanye isano na Coronavirus mu Bushinwa, kugira ngo batahure aho iyi virus yaturutse bya nyabyo.

Ibi byarakaje u Bushinwa cyane, buvuga ko Amerika idashishikajwe no kumenya aho iyi virus yaturutse ahubwo ishaka kwitwaza iki cyorezo kugira ngo ibone uko yibasira u Bushinwa cyane ko ari ibihugu bimaze iminsi bidacana uwaka.

Umuvugizi wa Minisiteri y’Ububanyi n’Amahanga mu Bushinwa, Zhao Lijian, yagize ati “Amerika ntiyitaye ku kumenya ukuri na gato ndetse nta n’ubwo ishishikajwe no gukora ubushakashatsi bushingiye kuri siyansi ku mvano y’iyi virusi. Icyo igamije ni ugukoresha iki cyorezo kugira ngo icishe bugufi u Bushinwa, ndetse yereke Isi ko ari igihangange yikureho ikimwaro.”

Iki kimwaro Lijian avuga ni ukuntu Amerika yananiwe guhangana na Covid-19.

Si ubwa mbere Amerika ishinja u Bushinwa kuba imbarutso y’icyi cyorezo, kuko mu ntangiriro za 2020 ubwo iki cyorezo cyari kiri gukwirakwira hirya no hino ku Isi, Donald Trump wahoze ari Perezida wa Amerika yibasiye u Bushinwa cyane avuga ko iyo buba amaso, Covid-19 itari gukwirakwira Isi, ndetse ko ikwiye kubiryozwa.

Umuvugizi wa Minisitiri w'Ububanyi n'Amahanga, Zhao Lijian yavuze ko Amerika idashishikajwe no kumenya ukuri, ahubwo irajwe ishinga no gusebya Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .