U Bushinwa bwemeje itegeko ryo kugenzura amasura y’abakoresha telefoni

Yanditswe na IGIHE
Kuya 2 Ukuboza 2019 saa 10:37
Yasuwe :
0 0

Leta y’u Bushinwa yashyizeho itegeko ryemeza ko abantu bose bagiye kugura telefoni nshya n’abashaka internet bazajya bagenzurwa amasura yabo mu rugamba rwo gukomeza gucunga umutekano w’amakuru yabo.

Aya mabwiriza mashya yashyizweho na Minisiteri y’Inganda n’Ikoranabuhanga mu Bushinwa (MIIT) yatangiye kubahirizwa kuva ku wa 1 Ukuboza 2019.

Asaba ko abafite gahunda yo kugura telefoni nshya batanga ikarita ndangamuntu yabo ariko iherekejwe n’isura yabo yanyujijwe mu cyuma (scanned face) kugira ngo ibikoresho bashaka bihuzwe n’imyirondoro yabo y’ukuri.

MIIT yatangaje ko uyu mwanzuro wafashwe ‘mu kurinda uburenganzira bw’ibanze n’inyungu z’abaturage muri iki gihe cy’iterambere ry’ikoranabuhanga’ ndetse ngo ushobora gufasha mu gukumira abakoresha telefoni mu bikorwa bidakwiye.

Abasesenguzi bagaragaza ko abayobozi b’u Bushinwa bakomeje gufata ingamba zikarishye zigamije gukumira abakoresha internet mu nyungu zabo bareba imbuga zabujijwe no gufunga abanenga Guverinoma. Kuri bo uyu mwanzuro uriyongera ku yindi Ishyaka riri ku Butegetsi Chinese Communist Party (CCP) urashyira iki gihugu mu bigenzura abaturage babyo bihambaye.

Ibiganiro kuri iyi ngingo byasembuye amarangamutima ya benshi nkuko babigaragaje ku mbuga nkoranyambaga zo mu Bushinwa zirimo Weibo.

Umwe yavuze ko icyemezo cyo kwandika umwirondoro w’ugiye kugura telefoni kimaze igihe cyarashyizweho.

Yagize ati “Kuneka telefoni ntibirahagarara. Gukusanya amakuru y’abaturage muri ubu buryo ni ukunona uburenganzira bw’ibanze bw’abantu.’’

Ishyaka riri ku Butegetsi mu Bushinwa (Communist Party of China: CPC) rigenzura cyane internet mu Bushinwa aho ikoreshwa n’abarenga miliyoni 850. Imbuga z’amakuru n’iza rubanda nyinshi zirimo Twitter, Facebook, Instagram, Youtube zarafunzwe. Abashaka kuzikoresha bifashisha ubundi buhanga mu kuzinjiramo.

U Bushinwa bwashoye imbaraga mu ikoranabuhanga rwo kugenzura amasura y’abantu nk’uburyo bwo guhoza ijisho ku baturage babwo.

Bivugwa ko mu Bushinwa habarizwa camera zisaga miliyoni 200 zikora ubugenzuzi mu gihugu hose.

Kugenzura isura y'umuntu ni itegeko mu Bushinwa mu gihe agiye kugura telefoni nshya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza