00:00:00 IGIHE NETWORK KN KINYARWANDA EN ENGLISH FR FRANCAIS

U Bushinwa bwateye utwatsi ibyo kongera gukorerwamo ubushakashatsi ku nkomoko ya COVID-19

Yanditswe na IGIHE
Kuya 15 Kanama 2021 saa 01:13
Yasuwe :
0 0

U Bushinwa bwanze igitekerezo giherutse gutangwa n’Ishami ry’Umuryango w’Abibumbye ryita ku Buzima (OMS) kigaragaza ko hakwiye kongera gukorwa iperereza rishya ku nkomoko ya Coronavirus.

Ku wa 12 Kanama 2021 nibwo OMS yatangaje ko ishaka kongera gutangiza ubushakashatsi bushya bugomba gukorerwa mu Bushinwa hagamijwe gucukumbura inkomoko ya COVID-19, inasaba u Bushinwa ubufatanye muri iyi gahunda.

Muri Mutarama 2021, OMS yari yohereje abashakashatsi bayo muri iki gihugu kugira ngo hakorwe raporo ya mbere ku nkomoko ya COVID-19.

Iyi raporo yakozwe ku bufatanye n’ubuyobozi bw’u Bushinwa ariko iza kunengwa ku kuba idasoza igaragaza neza inkomoko y’iki cyorezo ari nayo yabaye intandaro yo gusaba ko ubu bushakashatsi busubirwamo.

U Bushinwa ntibukozwa ibijyanye no gusubiramo ubu bushakashatsi, aho bwavuze ko bushyigikiye ko bwakorwa ku mpamvu za siyansi ko ariko budashobora kwemera ko bukorwa ku mpamvu za politiki.

Minisitiri wungirije w’Ububanyi n’Amahanga w’u Bushinwa, Ma Zhaoxu avuga kuri uyu mwanzuro yagize ati “Ntitwemera ubucukumbuzi bushingiye kuri politike no gutesha agaciro raporo ihuriweho, dushyigikiye ubucukumbuzi bushingiye kuri siyansi.”

Yakomeje avuga ko ubushakashatsi bwose bwakorwa bugomba gushingira ku byagaragajwe n’ubwakozwe mbere, aho kugira ngo hakorwe ubundi bushya.

“Imyanzuro n’inama zatanzwe na OMS n’u Bushinwa muri raporo ihuriweho byemewe n’amahanga ndetse na siyansi. Ubundi bushakashatsi bushobora gukorwa mu gihe kiri imbere, bwakorwa gusa igihe bwaba bwubakiwe ku byagaragajwe na raporo aho gutangira ubundi bushya.”

Raporo ikubiyemo ibyavuye mu bushakashatsi bwa mbere igaragaza ko COVID-19 ishobora kuba yaravuye mu ducurama ikinjira mu bantu, aho kuba yaba yarakowe muri laboratwari nk’uko bamwe bagiye babivuga.

Kongera gukora ubushakashatsi ku nkomoko ya COVID-19 ni imwe mu ngingo zimaze iminsi zitavugwaho rumwe, aho u Bushinwa bugaragaza ko butabishyigikiye mu gihe OMS yo ibusaba kubigiramo uruhare kugira ngo hamenyekane ukuri.

Minisitiri wungirije w’Ububanyi n’Amahanga w’u Bushinwa, Ma Zhaoxu yavuze ko batazemera ko hakorwa ubushakashatsi ku nkomoka ya COVID-19 butubakiye ku byavuye mu bwa mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .