U Bushinwa bwafatiye ibihano abadepite bo mu Bwongereza

Yanditswe na Bukuru JC
Kuya 26 Werurwe 2021 saa 02:00
Yasuwe :
0 0

Kuri uyu wa Gatanu, u Bushinwa bwafatiye ibihano abantu icyenda n’amatsinda ane nyuma y’uko ashinjwe kwivanga ‘gukwirakwiza ibihuha’ ku bibera mu Ntara ya Xinjiang iri mu Burengerazuba bw’icyo gihugu.

Mu ntangiriro z’iki cyumweru, ni bwo u Bwongereza bwiyongereye ku Muryango w’Ubumwe bw’u Burayi (EU), Canada, u Buholandi na Leta Zunze Ubumwe za Amerika biherutse gufatira ibihano bamwe mu bayobozi b’Intara ya Xinjiang, bashinjwa gukorera abo mu bwoko bwa ’Uyghur’ ibikorwa bibangamira uburenganzira bwabo.

Muri Xinjiang hari ibigo binini bikekwa ko birimo Aba-Uyghur barenga miliyoni. U Bushinwa buvuga ko ibibakorerwa muri ibyo bigo bigamije kubigisha no kubakuramo ibitekerezo by’ubuhezanguni, byashoboraga kuzavamo ibikorwa by’iterabwoba kuko abatuye muri icyo gihe benshi ari abo mu Idini ya Islam.

Ibihugu birimo Amerika na Canada bivugwa ko ibikorerwa ubwo bwoko ari iyicarubozo kandi bigize icyaha cya Jenoside, dore ko hari amakuru avuga ko abagore bo muri ubwo bwoko babuzwa kubyara, ku buryo ubwoko bwabo bugenda bucyendera.

Xinjiang ikora ku mipaka icyenda y’ibihugu byiganjemo ibifite imyemerere ya Islam, ndetse ni intara ikomeye cyane kuko umutungo kamere mwinshi u Bushinwa bufite uba muri iyo ntara. Ibituma Amerika ivuga ko itotezwa rikorerwa abo mu bwoko bw’Aba-Uyghur bigamije kwirinda ko bazaba ubwoko bukomeye bakiyongera cyane, bikagera ubwo basaba kwigenga kuko n’ubundi badasangiye umuco n’ururimi n’abandi Bashinwa.

Ibi birego byose u Bushinwa bubitera utwatsi, bukavuga ko ko nta Jenoside ikorerwa Aba-Uyghur ahubwo ko gahunda yo kubigisha yashyizweho yatangiye gutanga umusaruro ufatika mu bijyanye no kugabanya imyumvire ishingiye ku buhezanguni.

Mu badepite bahawe ibihano barimo Tom Tugendhat, Neil O’Brien, Tim Loughton, Nusrat Ghani, Baroness Kennedy n’abandi, bose bagahurira ku mugambi wo kunenga u Bushinwa.

Ibihano byatanzwe birimo ko abahanwe batemerewe kujya mu Bushinwa, gukorana ubucuruzi n’ibigo byo muri icyo gihugu ndetse imitungo yabo iri mu Bushinwa ikaba yafatiriwe.

Minisiteri y’Ububanyi n’Amahanga mu Bushinwa yavuze ko “U Bushinwa bufite intego yo kurinda ubusugire bwacu, umutekano ndetse n’iterambere. Turaburira u Bwongereza kureka kwivanga mu bikorerwa mu Bushinwa, bitabaye ibyo u Bushinwa buzihimura kuri ibyo bikorwa”.

Umwuka mubi hagati y’u Bushinwa, u Burayi n’u Bwongereza ubayeho mu gihe u Burayi n’u Bushinwa biri kwitegura kwemeza amasezerano y’ubufatanye mu by’ubucuruzi ndetse u Bwongereza na bwo bukaba buri mu gihirahiro gitewe n’uburyo imikoranire yabwo n’u Bushinwa izaba imeze, cyane cyane nyuma y’uko bwikuye mu bihugu bigize EU, aho bugomba gutangira kugirana amasezerano mashya y’ubucuruzi n’ibihugu by’amahanga.

Iyi ni yo nkambi icumbikira n'abo mu bwoko bw'Aba-Uyghur

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .