U Bushinwa: Abasaga 80 bamaze gufungwa bazira ibyaha bifitanye isano n’inkingo za Coronavirus

Yanditswe na Dufitumukiza Salathiel
Kuya 15 Gashyantare 2021 saa 02:01
Yasuwe :
0 0

Urwego rw’Ikirenga rushinzwe Ubushinjacyaha n’Iperereza mu Bushinwa (SPP) rwatangaje ko abantu babarirwa muri 80 bamaze gufungwa bakurikiranyweho ibyaha bifitanye isano n’inkingo za COVID-19, birimo gukora no gucuruza iz’inyiganano.

SPP yavuze ko kuri sitasiyo zayo ziri mu bice bitandukanye by’igihugu hafungiye abasaga 80 bafatiwe mu byaha 21 bifitanye isano n’izo nkingo.

Muri abo bafashwe, harimo abasanganywe doze z’inkingo z’inyiganano zisaga ibihumbi 58, zagiye zikorwa hifashishijwe umuti wa Saline usanzwe wifashishwa mu koza ibisebe no kuvura amaso.

Abafatanywe izo nkingo ngo bari bamaze kuzicuruzamo asaga miliyoni 2.8$ mu buryo bwa magendu.

Urwo rwego rwahise rusaba ko harushaho gukazwa ingamba zo guhangana n’ibyaha bijyanye n’inkingo za COVID-19 mu gihugu hose, ndetse hagashyirwaho uburyo bwemewe n’amategeko bugenga imirimo yo kurwanya icyo cyorezo kimaze guhitana abarenga miliyoni 2,4 mu Isi.

U Bushinwa bubaye igihugu cya mbere kivuzwemo inkingo z’inyigano mu gihe cyanabaye intangiriro y’ako gakoko gashya kamaze kwandura abarenga miliyoni 109 mu Isi hose.

Icyo gihugu kandi giherutse gushinjwa kwimana amakuru ajyanye n’uko icyo cyorezo cyaba cyarageze mu bantu, nyuma y’uko Ishami ry’Umuryango w’Abimumbye ryita ku Buzima,OMS, ryohereje abashakashatsi mu Mujyi wa Wuhan ufatwa nk’isoko y’ako gakoko.

Doze z’inkingo zisaga miliyoni 40 ni zo icyo gihugu kimaze kubona kugeza ubu zigifasha mu bikorwa byo gukingira abaturage bacyo, mu gihe cyari cyihaye intego y’uko icyumweru cyarangiye ku wa 14 Gashyantare cyagombaga kugera bafite doze miliyoni 100.

Abarenga 80 mu Bushinwa bamaze gufungirwa ibyaha bifitanye isano n'inkingo za COVID-19 harimo no kuzigana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .