U Burusiya bwateye utwatsi iby’amakuru ashobora kwangiza isura ya Trump

Yanditswe na Mukaneza M.Ange
Kuya 11 Mutarama 2017 saa 04:19
45 31

Umuvugizi wa Perezida w’u Burusiya, Vladimir Putin yahakanye ibivugwa ko iki gihugu kibitse amakuru ashobora kwangiza isura ya Donald Trump uherutse gutorerwa kuyobora Leta Zunze Ubumwe za Amerika.

Ku wa Kabiri nibwo umuyobozi mu nzego z’ubutasi za Amerika yabwiye Ibiro Ntaramakuru by’Abongereza, AP ko bashyikirije Trump raporo imugaragariza ko u Burusiya bufite amakuru yerekeye ubuzima n’ubutunzi bwe bwite kandi ayo makuru ashobora kwangiza isura ye.

Umuvugizi wa Perezida Poutin,Dmitry Peskov yavuze ko ibikubiye muri iyo raporo ari ibihimbano kandi u Burusiya butajya bwinjira mu bikorwa byo gukusanya amakuru ku buzima bwite bw’umuntu.

Amakuru yashyizwe hanze na CNN avuga ku bikorwa bitandukanye byakozwe na Trump ubwo yabaga ari mu Burusiya, umubano hagati ye n’abayobozi bakuru b’iki gihugu ndetse n’uburyo bamufashije kugira ngo atsinde amatora.

Evan McMullin wigeze gukora mu CIA yavuze ko kuba u Burusiya bufite amakuru y’ibanga kuri Trump, ngo byaba ari byo byihishe inyuma yo kuba uyu muherwe ugiye kuba perezida wa 45 wa Amerika atarahwemye kugaragaza uburyo ashima imyitwarire ya Putin.

Byinshi mu bikubiye muri iriya raporo bigizwe n’amakuru yatanzwe n’uwahoze ari umukozi w’Ibiro bishinzwe ubutasi mu Bwongereza, M6 wari warahawe akazi n’abadashyigikiye Donald Trump ngo abafashe kubona ibyo bakwifashisha mu kumurwanya.

Yaba Ibiro bya Perezida wa Amerika, FBI nta n’umwe wigeze agira icyo ashaka gutangaza ku bivugwa muri iriya raporo.

Ni mu gihe Trump we abinyujije kuri Twitter yavuze ko ibyatangajwe ari ibihimbano.

Leta Zunze Ubumwe za Amerika zishinja u Burusiya kwivanga mu matora y’iki gihugu no kwinjira mu mabanga y’ishyaka ry’aba-democrates, igikorwa cyagize uruhare mu gutuma Hillary Clinton atsindwa.

Ibi birego kandi byatumye ku itariki ya 29 Ukuboza 2016, Perezida Barack Obama afata umwanzuro wo kwirukana muri Amerika abadipolomate 35 b’ u Burusiya.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE