Kwamamaza

Ubwoba ni bwose nyuma y’aho u Burusiya butegetse abayobozi gucyura imiryango yabo

Yanditswe kuya 13-10-2016 saa 13:54' na Ntakirutimana Deus


Abayobozi bakuru mu Burusiya basabwe gucyura imiryango yabo iri mu mahanga, mu gihe hakomeje gututumba umwuka mubi hagati y’iki gihugu na Leta Zunze Ubumwe za Amerika.

Perezida w’u Burusiya, Vladimir Putin, yasabye abanyapolitiki n’abayobozi bakomeye mu gihugu gucyura abagize imiryango yabo mu gihugu vuba.

Ikinyamakuru cyo mu Burusiya, Znak, cyanditse ko abayobozi batandukanye,abagize Inteko Ishinga Amategeko, ndetse n’abakozi ba Leta mu Burusiya basabwe kwihutira kuvana abana babo mu mashuri bigagamo hanze y’icyo gihugu bagataha.

Ibi bibaye nyuma y’uko Perezida Putin asubitse uruzinduko yari kugirira mu Bufaransa, aho yari kubonana na Perezida w’icyo gihugu, François Hollande.

Mbere y’urwo ruzinduko rwagombaga kuba tariki ya 19 Ukwakira 2016, Hollande yavuze ko u Burusiya bukomeje kugira uruhare mu ntambara iri kubera muri Syria.

Umusesenguzi mu bya politiki y’u Burusiya, Fyodor Lukyanov,yavuze ko isubikwa ry’urwo ruzinduko mu gihe ibijyanye narwo byari bigeze ku musozo byerekana ko ibintu bikomeye ndetse byibutsa intambara y’ubutita.

U Burusiya kandi bwashyize intwaro za rutura hafi y’umupaka wabwo na Pologne.

Mikhail Gorbachev wahoze ari Umuyobozi wa Leta Zunze Ubumwe z’Abasoviyete yaburiye abantu ko Isi igeze ku rwego rubi bitewe n’umwuka mubi ukomeje kuvuka hagati y’u Burusiya na Amerika.

Ibyo bibaye nyuma y’uko mu minsi mike ishize, byari byavuzwe ko u Burusiya bwashyize izo ntwaro hafi y’uwo mupaka, nyuma y’uko umwuka mubi ukomeje kuvuka hagati yabwo na Amerika.

U Burusiya bwohereje misile zayo zikomeye( Iskander) kuri uwo mupaka, ahari ubutaka bwayo buri hafi y’inyanja ya Baltic, iri hafi y’ibihugu bya Pologne na Lithuania bimwe mu bigize OTAN.

Umwuka kandi ukomeje kuba mubi nyuma y’uko u Burusiya bugeragereje misile zabwo ku wa Gatatu w’iki cyumweru. Ibihugu byombi byaherukaga guterana amagambo muri 2014, ubwo u Burusiya bwivangaga mu gace ka Crimée, intara ya Ukraine iherutse gufata icyemezo cyo kwigenga nyuma yuko bitowe n’abahatuye.

Ibyo byatumye u Burusiya busesa amasezerano atandukanye bwari bwaragiranye na Amerika, ku bijyanye no guharanira amahoro hagati y’ibihugu byombi.

Amerika yakunze gushinja u Burusiya gukora ibyaha by’intambara muri Syria, biciye mu kurasa ku batavuga rumwe n’ubutegetsi bwa Syria bari mu Mujyi wa Aleppo.

U Burusiya na Amerika kandi bafitanye ikindi kibazo cy’uko ngo icyo gihugu gikekwaho kugira uruhare mu kwiba ubutumwa (emails) bw’Umujyanama wa Hillary Clinton mu bikorwa arimo byo kwiyamamariza kuyobora Amerika.

Ibiro bya Amerika bishinzwe iperereza (FBI) birimo gukurikirana imvano y’icyo kibazo.

Hagati aho u Burusiya bwamaganiye kure ibyo kubushinja kwivanga muri ayo matora, ndetse n’ibyo kuba inyuma y’ubujura bwo kwiba amakuru inzego zitandukanye za Amerika.

Umwuka mubi kandi urakomeza gutizwa umurindi n’ibihugu by’i Burayi bisa n’ibidashyigikiye u Burusiya, kugeza ubwo Minisitiri w’u Bwongereza ushinzwe Ububanyi n’Amahanga, Boris Johnson ahamagariye abaturage kwigaragambiriza imbere y’Ambasade y’u Burusiya i Londres mu Bwongereza, kubera uruhare u Burusiya bushinjwa mu ntambara ya Aleppo.

Perezida Vladimir Putin yasabye abanyapolitiki n’abayobozi bakuru mu gihugu gucyura vuba inshuti n’abavandimwe mu miryango yabo
U Burusiya bwohereje imodoka za gisirikare ku mupaka wa Pologne

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved