U Burusiya bwatangije imyiyereko idasanzwe ya gisirikare

Yanditswe na David Eugène Marshall
Kuya 12 Nzeri 2018 saa 09:29
Yasuwe :
0 0

Ingabo ibihumbi 300.000 z’u Burusiya, hamwe n’abasirikare 3.200 b’Abashinwa bari mu myitozo y’intambara bivugwa ko yaba ariyo ya ya mbere yo kuri urwo rwego mu myaka isaga 30 ishize.

Ni imyitozo yiswe Vostok-2018 ibaye mu gihe hari icyuka kibi hagati y’ibihugu byo mu burengerazuba bw’isi n’iki gihugu cy’igihangange, izaba irimo ibikoresho bikomeye n’indege z’intambara zigera ku 1000.

Ku ruhande rw’u Bushinwa, abasirikare babwo 3.200 bitwaje indege z’intambara esheshatu na za Kajugujugu 24 bari mu bari bufatanye n’Ingabo z’u Burusiya muri iyi myitozo.

Mu mashusho yashyizwe hanze na Minisiteri y’Ububanyi n’amahanga y’u Burusiya kuri uyu wa Kabiri, hagaragaye imirongo y’amakamyo ya gisirikare ahetse imodoka z’imitamenwa z’intambara n’ibifaru bitabarika, harimo za kajugujugu n’amato by’intambara byerekezwaga mu gace k’uburasirazuba bw’u Burusiya, aho iyi myitozo izabera.

Iyi minisiteri itangaza ko iki ari icyiciro cya mbere cy’iyi myitozo, aho igisirikare kigomba kwisuzuma no kugaragaza ko gifite ubushobozi bwo gutabara no kurwanira kubuso bwagutse cyane.

Harimo no kongera ubumenyi bugamije guhuza ibikorwa by’intambara zo mu kirere, mu mazi no ku butaka by’igisirikare cy’u Burusiya; ahantu hanini kandi mu gihe gito.

Imyitozo ya Vostok-2018 izabera ku bilometero 5.000 uvuye i Moscou, bukazaba uburyo bwo kwerekana igihagararo cy’igisirikare cy’u Burusiya ku bihugu nka Koreya zombi, u Buyapani, Mongolia n’ibindi bituranye.

Ikinyamakuru 7sur7 cyatangaje ko mbere gato y’uko iyi myitozo iba, ba perezida Vladimir Poutine w’u Burusiya na Xi Jiping w’u Bushinwa bari mu biganiro ku cyambu cy’u Burusiya cya Vladivostok, aho bagaragaye bari gusangira ikirahure.

Binavugwa ko ibiganiro byabo byibanze ku kuri Korea ya Ruguru n’ibijyanye n’ubufatanye mu by’ubukungu.

Impuguke mu bya gisirikare akaba n’umuyobozi w’Ikigo Carnegie gikora amasesengura mu bya gisirikare kiri Moscou, Colonel Dmitri Trenin, yatangarije Reuters ko kuba u Bushinwa n’u Burusiya biri kurushaho gukorana mu bya gisirikare, ari ubutumwa bukomeye ku bihugu byo mu Burayi na Amerika bihora bicungana ku jisho.

Colonel Dmitri yagize ati “Iyi myitozo igamije kwerekana ko niba Amerika ari umwanzi w’u Burusiya, u Bushinwa ari incuti zabwo”.

Minisitiri w’Ingabo w’u Burusiya, Sergei Shoigu yatangaje ko iyi ariyo myitozo ihambaye ikozwe n’Ingabo z’u Burusiya, nyuma y’iyabaye mu 1981 yitiriwe Zapad81.

Iyi imyitozo izamara icyumweru, izakurikiranwa na Vladmir Poutine ubwe, agaragiwe n’abakuru b’ingabo.

Umuryango wo gutabarana uhuza ibihugu bihurira ku Nyanja ya Atlantica y’amajyaruguru, OTAN, watangaje ko utazabura gukurikiranira hafi ibikorwa by’igisirikare cy’u Burusiya, gifatwa nka mukeba wawo mu bya gisirikare.

Haribazwa ubutumwa u Burusiya bugiye gutanga mu kwerekana ubushobozi bufite mu bya gisirikare
Intwaro zikomeye z'u Burusiya zateganyiejwe iyi myiyereko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza