U Buhinde:Televiziyo ikomeye yahaniwe gutangaza inkuru ku bitero by’iterabwoba

Yanditswe na Kanamugire Emmanuel
Kuya 5 Ugushyingo 2016 saa 01:04
45 30

Abanditsi bakuru bakomeye n’abanyamakuru mu Buhinde bamaganye icyemezo cya leta gihagarika imwe muri za televiziyo zo mu gihugu kuko yerekanye inkuru ijyanye n’ibitero by’iterabwoba byabaye umwaka ushize.

Abo banyamakuru bavuga ko ihagarikwa rya NDTV ryibutsa ibihe nk’ibyo itangazamakuru ryanyuzemo mu mwaka wa 1975, ubwo hashyirwagaho amategeko abangamira ubwisanzure bw’itangazamakuru.

Inkuru dukesha VOA ivuga ko Minisiteri ifite itangazamakuru mu nshingano zayo yavuze ko televiziyo ya NDTV itangaza inkuru mu Gihinde yatangaje amakuru y’ibanga yashoboraga gukoreshwa n’imitwe y’iterabwoba kandi ko yabangamiye umutekano w’igihugu mu gikorwa cyo guhiga abarwanyi bari bagabye igitero ku kigo cya gisirikare cya Pathankot mu majyaruguru y’u Buhinde, muri Mutarama, cyahitanye abasirikare barindwi bo mu ngabo za leta.

Hagati aho ariko ubuyobozi bwa televiziyo ya NDTV bwibajije impamvu ari yo yonyine yahagaritswe, mu gihe iyo nkuru yatambutse no mu bindi bitangazamakuru.

Abahagarariye ibitangazamakuru bavuga ko icyemezo cya leta giciye ukubiri n’uburenganzira bw’itangazamakuru.

Ibitangazamakuru byo mu Buhinde byahawe amabwiriza umwaka ushize yo kudatangaza inkuru zifitanye isano n’ibitero, nyuma y’izatangajwe mu 2008 ku bitero by’ubwiyahuzi byabereye mu mujyi wa Mumbai.

Ubwoba bwari bwose ko amakuru yashyizwe hanze yerekeye uduce inzego z’umutekano n’abasivile baherereyemo yashoboraga gufasha ibyihebe byagabye igitero cyahitanye abagera ku 170.

Umwaka ushize na bwo leta yahagaritse Televiziyo y’Abanya-Qatar, Aljazeera ishami ry’Icyongereza iminsi itanu izira gutangaza inkuru igaragaza tumwe mu duce tw’u Buhinde twigarruriwe na Pakistan.

Abasirikare ba leta y'u Buhinde barinze ikigo cya gisirikare cya Pathankot

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE