00:00:00 IGIHE NETWORK KN KINYARWANDA EN ENGLISH FR FRANCAIS

U Buhinde: Indwara idasanzwe yadukiriye abakirutse Covid-19, bamwe bari kuvanwamo amaso

Yanditswe na Muhonzire Sylvine
Kuya 23 Gicurasi 2021 saa 08:16
Yasuwe :
0 0

Mu Buhinde hagaragaye indwara idakunze kugaragara yitwa ‘mucormycose’ ku bantu bakize Covid-19, ndetse hakaba hamaze kuboneka abayirwaye barenga 8.800, imibare ikaba ikiri kwiyongera.

BBC yatangaje ko iyi ndwara iri kwica abayirwaye ku kigero cya 50%, n’abayikira hari igihe bisaba ko bakurwamo ijisho, ndetse n’imiti ivura iyi ndwara ikaba iri kuba mike bitewe n’uko ikenewe cyane.

Iyi ndwara ya mucormycose ikunda kugaragara mu butaka, mu bimera, imbuto n’imboga. Ni gake ifata abantu ariko iyo ibafashe ifata mu bihaha, mu mazuru, ndetse hari igihe ifata n’amaso kuburyo ishobora gutuma umuntu ahuma, cyangwa igafata mu bwonko, aho uyirwaye ababara umutwe cyangwa agafatwa igicuri.

Bitewe n’igice yafashe, iyi ndwara ikunda kurangwa no kubyimba mu maso, umuriro, kuzana ibisebe ku mubiri, cyangwa udusebe tw’umukara mu kanwa.

Mucormycose ikunda kwibasira abantu bafite izindi indwara zikomeye nka diabète, kanseri cyangwa abarwaye agakoko gatera SIDA. Naho ku barwaye Covid-19, iri gufata ab’imibiri yabo yarembejwe n’iki cyorezo cyangwa abafite umubiri ufite intege nke gusa ku bw’amahirwe ntabwo yandura.

Mu Buhinde abantu bari kugaragaraho iyi ndwara ari benshi ni abagabo barwaye Covid-19 cyangwa bamaze igihe gito bayikize, kandi barwaye diabète.

Ubushakashatsi butandukanye bwakozwe n’abaganga bane bo mu Buhinde, bwakorewe ku bantu barenga 100 barwaye iyi ndwara banafite Covid-19, bwagaragaje ko 79 bari abagabo kandi 83 muri bo bari barwaye diabète.

Ubundi bushakashatsi bwakorewe mu Bitaro bya Mumbai ku barwayi 45 bafashwe n’iyi ndwara, bwasanzwe bose ari abarwayi ba diabète.

Dr Akshay Nayar yabwiye BBC ati “Nta murwayi wa Mucormycose ufite isukari iri ku rugero rwiza.”

Inzobere zivuga ko iyi ndwara iri gufata abantu bamaze iminsi hagati ya 12 na 18 bakize Coronavirus.

Umuganga ukuriye Ibitaro bya Maharaja Yeshwantrao, Dr VP Pandey, yavuze ko iyi ndwara ihangayikishije kuruta Covid-19, kuko niramuka itavuwe neza, izica abantu benshi.

Ati “Mucormycose ubu itangiye guteza ikibazo kurusha Covid-19. Niba abarwayi batavuwe neza kandi ntibavurwe ku gihe, umubare w’abahitanwa nayo ushobora kuzamuka ukagera kuri 94%. Kuvura iyi ndwara birahenze kandi imiti iri kubura.”

Nyuma yo kugira ubwandu bwinshi bw’abarwaye ubwoko bushya bwa Covid-19, iki gihugu cyibasiwe n’iyi ndwara iri gufata cyane abarwaye diabète kandi barwaye Coronavirus cyangwa bayikize.

U Buhinde ni cyo gihugu cya kabiri ku Isi gifite abarwayi benshi ba diabète nyuma y’u Bushinwa.

Indwara ya mucormycose ikomeje gufata abarwayi ba Covid-19 mu Buhinde, cyangwa amaze igihe gito bayikize/Ifoto: AFP

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .