00:00:00 IGIHE NETWORK KN KINYARWANDA EN ENGLISH FR FRANCAIS

U Buhinde: Igerageza ry’urukingo rwa Covid-19 runyuzwa mu mazuru ryatanze icyizere

Yanditswe na Umwali Zhuri
Kuya 12 Nzeri 2021 saa 02:54
Yasuwe :
0 0

Icyiciro cya mbere cy’igerageza ry’urukingo rwa Covid-19 runyuzwa mu mazuru (intranasal vaccine), ibyavuyemo byatanze icyizere ku guhashya icyo cyorezo haba mu kurinda umuntu kucyandura no kucyanduza abandi.

Ni igerageza riri gukorwa n’ikigo gikora imiti n’inkingo cyo mu Buhinde, Bharat Biotech. Iby’ibanze byavuyemo bigaragaza ko urwo rukingo rukora neza.

Dr VK Paul, umwe mu bakoze ubushakashatsi yavuze ko ibirambuye byavuye mu bushakashatsi bizatangazwa mu minsi ya vuba.

Bharat Biotech yatangiye gukora ku rukingo rwa Covid-19 runyuzwa mu mazuru, nyuma yo gukora urundi ruterwa mu rushinge ruzwi nka Covaxin. Uru rwa nyuma rwatangiye gukoreshwa mu Buhinde.

Bivugwa ko mu igerageza, urwo rukingo rushya rwahawe abantu bari hagati y’imyaka 18 na 60 batarwaye. Biteganyijwe ko mu minsi mike, hazakorwa igerageza rya kabiri n’irya gatatu kugira ngo harebwe ubushobozi bwarwo bidasubirwaho.

Ku rubuga rwa Bharat Biotech, hagaragaraho ko urwo rukingo ruri gukorwa runyuzwa mu mazuru, rufite ubushobozi buhagije bwo guhangana na Covid-19 kuko rwubaka ubwirinzi bukomeye by’umwihariko mu mazuru mu gace kazwi nka nasal mucosa gakuriramo virus, bigafasha mu kwirinda ko umuntu yakwanduza abandi.

Ni urukingo bidasaba inzobere mu buvuzi mu kurutanga kuko nta rushinge bisaba gutera, kandi gukora ubwo bwoko bw’inkingo bikaba byihuta, nkuko Hindu Times yabitangaje.

Umuyobozi mukuru ushinzwe ibya siyansi mu Ishami ry’Umuryango w’Abibumbye ryita ku buzima (OMS), Dr Soumya Swaminathan muri Gicurasi uyu mwaka yavuze ko inkingo zicishwa mu mazuru niziramuka zibonetse, bizaba ari amahirwe akomeye ku guhashya burundu icyorezo cya Covid-19.

Ikindi izi nkingo zitezweho ni ukorohereza abana gukingirwa kuko zitabatera ubwoba nk’inshinge.

Biteganyijwe ko urukingo rwa Covid-19 runyuzwa mu mazuru niruboneka, ruzitabirwa ku bwinshi kurusha uruterwa binyuze mu rushinge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .