00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa: Umugabo yahaga ibiyobyabwenge umugore we akamushumuriza abamusambanyiriza mu buriri bwe

Yanditswe na Umutoni Rosine
Kuya 30 Nzeri 2021 saa 03:15
Yasuwe :
0 0

Abagabo icyenda batawe muri yombi ku wa 28 Nzeri 2021, mu Majyepfo y’u Bufaransa, bashinjwa gusambanya umugore wo mu gace ka Vaucluse, wabaga yahawe ibiyobyabwenge n’umugabo we agashyirwayo ntamenye ibyamubayeho.

Ni ibikorwa bibabaje byo gusambanya mu buryo bwa rusange byagaragajwe n’inzego z’ubuyobozi.

Ku wa 28 Nzeri 2021, abagabo icyenda ni bwo bafashwe bakuwe mu bice bitandukanye by’Amajyepfo y’u Bufaransa.

Umugore bakekwaho gusambanya atazi ikijya mbere ari mu kigero cy’imyaka 60 y’amavuko.

Umugabo bashakanye ni we wabigizemo uruhare kuko yamutegeje bagenzi be nyuma yo kumuha imiti imusinziriza nk’uko ikinyamakuru Le Parisien cyabitangaje.

Ni ibikorwa byagiye byisubiramo kuva mu 2013, byabaga nijoro mu nyubako iherereye mu cyaro cy’ahitwa Mazan mu Ntara ya Vaucluse.

Abagabo 44 bamaze gufatwa barimo icyenda bafashwe ku wa 28 Nzeri 2021 mu gihe 35 bafashwe mbere bakozweho iperereza ndetse barafungwa.

Bijya gutangira, ku wa 12 Nzeri 2020, umukecuru ufite imyaka 68 wari mu kiruhuko cy’izabukuru, yafashwe azira gufata amashusho munsi y’amajipo y’abagore benshi ubwo bari mu iguriro rya Carpentras.

Batatu muri bo baramureze ariko aza kurekurwa, Nyuma iwe mu rugo harasatswe hagaragara ibikoresho by’ikoranabuhanga birimo mudasobwa, camera n’ibindi.

Abapolisi batahuye kandi amashusho y’umugore we bigaragara ko yasindishijwe kugeza ubwo ata ubwenge hanyuma agahabwa abantu batazwi.

Byatumye umugabo we afungishwa ijisho ku wa 2 Ugushyingo 2020.

Umugore yahamagajwe n’inzego z’ubuyobozi zamweretse ubuzima yabayemo atabizi, mu gihe ibikorwa yakorewe byaberaga mu buriri bwe n’uwo bari barashakanye.

Umwunganizi we mu mategeko, Caty Richard, yavuze ko akibimenya yahise amera nk’ugwiriwe n’Isi yibaza uko umugabo bari bamaranye imyaka 50 yamukorera ibintu nk’ibyo.

Uwo mugabo yakoreshaga dose nyinshi z’ibinyabutabire byitwa benzodiazepine, bigasinziriza umugore we ubuticura.

Uyu mukecuru yakorewe ibizamini ku gusambanywa mu buryo bw’indengakamere no kunyweshwa ibintu byangiza. Mu ngaruka byamugizeho harimo gusinzira bya hato na hato no kuribwa umutwe ariko nta biyobyabwenge bamusanzemo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .