Kwamamaza

U Bufaransa:Montebourg ashobora gukubita incuro Hollande mu bazahagararira ishyaka

Yanditswe kuya 4-10-2016 saa 10:38' na Philbert Hagengimana


Ikusanyabitekerezo ryakozwe ku matora y’ibanze y’uzahagararira ishyaka ry’Aba-socialiste mu matora y’Umukuru w’Igihugu mu Bufaransa, riraha amahirwe menshi Arnaud Montebourg wari Minisitiri w’ubukungu, kurusha Perezida François Hollande.

Radiyo Mpuzamahanga y’Abafaransa (RFI) dukesha iyi nkuru, itangaza ko ku cyumweru ari bwo Arnaud Montebourg yatangaje ko azahatana mu matora y’ibanze mu ishyaka ry’Aba-socialiste, ari na ryo François Hollande uri ku butegetsi abarizwamo.

Ikusanyabitekerezo ryakozwe mbere y’uko Montebourg atangaza ko azahatana, ryamuhaye amahirwe yo guhagararira iri shyaka mu matora y’Umukuru w’Igihugu ku kigero cya 52% imbere ya François Hollande ryahaye 48%.

Icyakora iryo kusanyabitekerezo ryahaye amahirwe menshi Minisitiri w’Intebe w’u Bufaransa, Manuel Valls kuruta Montebourg, ku kigero cya 51% kuri 49%, nubwo Vall ubwe ataratangaza niba aziyamamaza.

Montebourg yari Minisitiri w’Imari mu Bufaransa, aza kuva muri Guverinoma mu 2014, ashinjwa kwigomeka kuri gahunda za leta harimo kunenga imiyoborere ya Perezida Hollande, aho yamushinjaga gusoresha n’imitungo iciriritse.

Mu matora y’ibanze yabanjirije ay’Umukuru w’Igihugu aheruka kuba muri iki gihugu mu 2012, Montebourg wibona nk’umucunguzi w’ubukungu bw’u Bufaransa yari yaje ku mwanya wa gatatu inyuma ya Hollande na Martine Aubry.

Uretse Perezida François Hollande, Montebourg azaba ahanganye n’abandi bakandida batatu muri ayo matora y’ibanze yo mu ishyaka ry’Aba-socialiste, barimo Benoît Hamon, Senateri Marie-Noëlle Lienemann na Gérard Filoche, umwe mu bayobozi b’iri shyaka.

Perezida François Hollande ategerejweho gutangaza niba azahangana muri aya matora mu Ukuboza, gusa ababikurikiranira hafi bavuga ko uyu mugabo ashobora kutaziyamamaza.

Amatora y’ibanze y’ishyaka ry’Aba-socialiste ateganyijwe kuba tariki 22 kugeza ku wa 29 Mutarama 2017, mu gihe ay’Umukuru w’igihugu ateganyijwe kuba muri Mata na Gicurasi uwo mwaka.

Ntibisanzwe ko Perezida uri ku butegetsi yongera kwiyamamaza ahereye mu matora y’ibanze, kuko ubusanzwe yahitaga ahatanira umwanya w’Umukuru w’Igihugu muri manda ikurikiyeho, ariko muri Kamena uyu mwaka ishyaka ry’Aba-socialiste ryatangaje ko ryafashe icyemezo cy’uko Perezida François Hollande agomba guhera mu matora y’ibanze hashingiwe ku kuba byaragaragaye ko adakunzwe n’abaturage b’igihugu cye.

Bamwe mu baturage b’u Bufaransa bagiye bagaragaza kutishimira umuyobozi wabo nyuma y’uko bitangajwe ko aca inyuma uwari umugore we Valérie Trierweiler, agacudika rwihishwa n’umukinnyi wa filimi, Julie Gayet byaje gutuma banatandukana mu 2014.

Ubwo Hollande yiyamamazaga mu matora yabaye mu 2012, yavugaga ko azagabanya umubare w’abashomeri, ariko ubu ngo abadafite akazi mu Bufaransa bikubye gatatu kuva yajya ku butegetsi.

Arnaud Montebourg ahabwa amahirwe yo guhigika Hollande mu matora y'ishyaka ryabo

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved