00:00:00 IGIHE NETWORK KN KINYARWANDA EN ENGLISH FR FRANCAIS

U Bufaransa: Dr Buzyn wahoze ari Minisitiri w’Ubuzima ari gukorwaho iperereza ry’uko yitwaye mu guhashya Covid-19

Yanditswe na Zigiranyirazo Bajecteur
Kuya 11 Nzeri 2021 saa 01:18
Yasuwe :
0 0

Dr. Agnès Buzyn wabaye Minisitiri w’Ubuzima mu Bufaransa hagati ya 2017 na 2020, ari gukorwaho iperereza ku cyatumye Covid-19 ishyira ubuzima bwa benshi mu kaga mu Bufaransa.

Muri Gashyantare 2020 ni bwo Dr Buzyn yavuye ku mwanya wa Minisitiri w’Ubuzima mu Bufaransa ubwo yari agiye kwiyamamariza kuba Meya wa Paris ariko asiga avuze ko abona icyorezo cya Covid-19 nta byago byinshi giteje.

Nyuma yaje kwivuguruza avuga ko icyo cyorezo akibona nk’inkubi y’umuyaga wa serwakira isatiriye Isi.

Urukiko rudasanzwe rwashyizweho mu Bufaransa mu 1993 ngo rujye rufasha mu ikurikiranwa ry’abaminisitiri barangwa n’imyitwarire idahwitse, ni rwo rutegerejweho kuzafata umwanzuro niba nta ruhare yagize rwatumye Covid-19 ifata intera mu gihugu.

Ikinyamakuru Le Monde kivuga ko Dr Buzyn ari gukorwaho iperereza ku "kunanirwa kurwanya icyorezo".

Ku wa Gatanu ubwo yitabaga urukiko, yavuze ko yakiranye neza amahirwe yo kwisobanura anongeraho ko ibikorwa byakozwe na Guverinoma cyangwa we ubwe bidakwiye guteshwa agaciro “kandi twarakoze byinshi ngo dutegurire igihugu cyacu guhangana n’icyorezo cyibasiye isi”.

Dr. Agnès Buzyn w’imyaka 58 ntiyabashije gutsinda amatora yo kuba Umuyobozi w’Umujyi wa Paris nubwo ari byo byari byatumye asezera ku nshingano ze nka Minisitiri w’Ubuzima. Anne Hidalgo niwe wongeye gutorwa.

Muri Mutarama 2021, Dr Buzyn yahise ajya mu Ishami ry’Umuryango w’Abibumbye ryita ku Buzima, OMS, riyobowe na Tedros Adhanom Ghebreyesus.

Hakomeje gukorwa icukumburwa ku buryo bwagutse, rizagaragaza uko Guverinoma y’u Bufaransa yitwaye mu gushaka ibisubizo byo gukumira ikwirakwira rya Covid-19.

Olivier Véran usigaye ari Minisitiri w’Ubuzima mu Bufaransa, na we ashobora gutumizwa mu byumweru bike biri imbere agakorwaho iperereza nk’iriri gukorerwa uwo yasimbuye.

Abarenga miliyoni 6,7 bamaze kwandura Covid-19 mu Bufaransa mu gihe abarenga ibihumbi 113 bo bahitanywe nayo.

Dr. Agnès Buzyn wabaye Minisitiri w’Ubuzima mu Bufaransa hagati ya 2017 na 2020 rizagaragaza uruhare rwe mu kurwanya Covid-19

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .