U Bufaransa: Abarwanashyaka ba Hollande batangiye kumukuraho amaboko

Yanditswe na Ishimwe Israel
Kuya 18 Ukwakira 2016 saa 08:19
Yasuwe : XX
0

Nyuma y’igitabo abanyamakuru babiri banditse kuri Perezida François Hollande, bamwe mu barwanashyaka be bamukuyeho icyizere mu matora ataha y’Umukuru w’Igihugu, byongerera amahirwe Manuel Valls bahanganye.

Abanyamakuru babiri, Gérard Davet na Fabrice Lhomme, baherutse gushyira ahagaragara igitabo bise “Un président ne devrait pas dire ça” bivuze mu Kinyarwanda ngo “Perezida ntakwiye kuvuga ibi”. Ni igitabo banditse kuri François Hollande, Umukuru w’Igihugu cy’u Bufaransa.

Muri icyo gitabo cy’amapaji 700, abo banyamakuru bagaragaje aho Perezida Hollande yagiye avuga ku bandi bayobozi, ariko bitsa cyane ku magambo yavuze kuri Nicolas Sarkozy yasimbuye, aho yamugaragaje nk’utarigeze agira icyo akora na kimwe.

Hari aho yamugaragaje nk’umunyabwoba, wisuzuguraga kugeza ubwo no mu gihe cyo kwiyamamaza yisuzuguraga. Hari n’aho yagize ati “Yaba umukandida mwiza, ariko ntiyaba Perezida mwiza.”

Nyuma y’iki gitabo, bamwe mu barwanashyaka be batangiye kumwikoma, ari na yo mpamvu yabikomojeho mu kiganiro mu kinyamakuru cyitwa Ebra cyasohotse mu cyumweru gishize.

Perezida François Hollande yagize ati “Ikinshishikaje kandi ntazatezuka gukora, ni ugusubiramo ibikorwa byanjye. Nanyuze mu bibazo byinshi, sinigeze nduhuka, kandi byose byarangiye neza.”

Mu barwanashyaka be bamwe bamuvumira ku gahera bavuga ko hari n’ibibi yakoze, ntibatinye kugaragaza ko badahamanya na we ku myato yivuga, bakanashidikanya ku cyemezo cyo kongera kwiyamamaza mu matora ataha y’Umukuru w’Igihugu.

Muri rusange icyumweru gishize nticyoroheye Perezida François Hollande, aho mu bamutakarije icyizere harimo na Claude Bartolone, Umuyobozi w’Inteko Ishinga Amategeko, ndetse na Jean-Christophe Cambadélis, Umunyamabanga w’ishyaka ry’Aba-Socialistes, bombi bagaragaje ko hashingiwe kuri icyo gitabo, bisa n’aho yatwitse intwaro yari kuzaba yitwaje mu matora y’umukuru w’igihugu azaba mu 2017.

Senateri Luc Carnouvas atangaza ko ibyanditswe mu gitabo “Un président ne devrait pas dire ça” ari nk’indobo yuzuye amazi ashyushye basutse kuri Perezida Hollande, ndetse ngo bikaba bitagishobotse kumutabara, ibi bigaha amahirwe menshi Manuel Valls.

Perezida Hollande akomeje gutakarizwa icyizere na bamwe mu barwanashyaka bakomeye b’ishyaka rye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza