Kwamamaza

U Bufaransa: Amagambo Alain Juppé yavuze ku wo bahanganye yanenzwe

Yanditswe kuya 24-11-2016 saa 11:38' na Mukaneza M.Ange


Bamwe mu bagize Inteko Ishinga Amategeko y’u Bufaransa banenze imyitwarire ya Alain Juppé, umwe mu bahatanira guhagararira ishyaka ry’ Aba-Républicains mu matora y’umukuru w’igihugu, bamushinja kwibasira mugenzi bahanganye.

Mu butumwa aba badepite n’abasenateri baturuka mu ishyaka ry’Aba-Républicains n’Aba-centriste banyujije mu kinyamakuru le Figaro kuri uyu wa 24 Ugushyingo 2016, bagaragaje ko batishimira imvugo zidakwiye Juppé akoresha iyo avuga kuri François Fillon bahanganye mu matora y’ibanze yo gushaka uzahagararira ishyaka ry’Aba-Républicains mu matora y’umukuru w’igihugu ateganyijwe umwaka utaha.

Mu cyiciro cya mbere cy’amatora y’uzahagararira iri shyaka, François Fillon niwe waje ku mwanya wa mbere n’amajwi 44.2%, akurikirwa na Alain Juppé wabonye 28.5% mu gihe we Nicolas Sarkozy yahise azererwa afite amajwi 20.6% gusa.

RFI ivuga ko Juppé usanzwe ayobora umujyi wa Bordeaux, ashinjwa gupfobya ibyo Fillon baturuka mu ishyaka rimwe avuga ko azakora birimo kugabanya imirimo mu nzego za leta.

Anerekana ko kandi Fillon adafite aho ahagaze ku itegeko rivuga ku byo gukuramo inda.

Abagize Inteko Ishinga Amategeko bagera kuri 215 basabye ko habaho ibiganiro mpaka birimo ukuri ariko impande zombi zikagaragaza kubahana.

Biteganyijwe ko uyu munsi ku wa kane ari bwo aba bakandida babiri, Juppé na Fillon bahurira mu biganiro mpaka biri buce kuri televiziyo. Icyiciro cya kabiri cy’amatora y’ibanze cyo kizaba ku cyumweru gitaha.

Ubushakashatsi (sondage) bwakozwe na Paris Match, iTELE na Sud Radio, bwerekanye ko François Fillon ari we uzegukana umwanya wo guhagararira iri shyaka mu matora y’umukuru w’igihugu ku majwi 65% mu gihe Alain Juppé azagira 35%.

Alain Juppé anengwa kwibasira mugenzi we basangiye ishyaka

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved