U Budage bwagaragaje impungenge ku bwirinzi bw’urukingo rwa AstraZeneca ku bantu bakuru

Yanditswe na Ndahayo Emmanuel
Kuya 28 Mutarama 2021 saa 10:10
Yasuwe :
0 0

Inzego z’ubuzima mu Budage zatanze umuburo ku bushobozi bw’urukingo rwakozwe n’uruganda rwa AstraZeneca ku bufatanye na Kaminuza ya Oxford, zivuga ko amakuru y’ubushobozi bw’urwo rukingo bwo kurinda abantu barengeje imyaka 65 atizewe neza.

Abakora mu nzego z’ubuzima mu Budage bavuze ko batahamya ko urukingo rwa AstraZeneca rudashobora gukingira Coronavirus ku bantu bakuru, gusa nanone bakavuga ko kuba nta makuru ahari ahagije agaragaza ubushobozi bwarwo ku bantu bakuru, biteye impungenge.

Ubwo habaga amagerageza y’urukingo rwa AstraZeneca, bivugwa ko abahanga barukoze banze kuyakorera ku bantu bakuru, bagahitamo kwibanda ku bari hagati y’imyaka 18 na 55, kuko ari bwo urukingo rwari rufite amahirwe yo kwemezwa vuba.

Bivugwa ko amagerageraza ku bantu bakuru yatangiye nyuma cyane urukingo rwenda kwemezwa mu bihugu birimo u Bwongereza, akaba ari nayo mpamvu kugeza ubu amakuru y’ibyavuye mu magerageza yakorewe abo bantu atarasesengurwa neza yose, ku buryo inzego z’ubuzima mu Budage zivuga ko bidakwiye guhita wizera ingaruka uru rukingo rwagira ku bantu barengeje imyaka 65.

Umuyobozi wa AstraZeneca, Pascal Soriot, yavuze ko "ikibazo atari ubushobozi bw’urukingo rwa AstraZeneca bwo kurinda abantu bakuru, ahubwo ko ari uko hari amakuru make abyemeza."

Yavuze ko bafite ibimenyetso bigaragaza ko uburinzi butangwa na AstraZeneca ku bantu bakuru bungana n’ubwo uru rukingo rutanga ku bantu bato, gusa kuko nta makuru ahagije bafite, akaba ari yo mpamvu "hari ibihugu bimwe bishobora kutazaruha abantu bakuru bitewe no kutazizera neza".

Hagati aho, ibihugu by’u Bwongereza bimaze hafi ukwezi bitanga urukingo rwa AstraZeneca ku bantu bose barimo n’abarengeje imyaka 65.

Minisitiri w’Intebe w’u Bwongereza, Boris Johnson, yavuze ko ibyo bakoze bishingiye ku makuru y’inzego z’ubuzima muri icyo gihugu zavuze ko urwo rukingo "rwizewe kandi rutanga ubwirinzi buhagije ku byiciro byose by’abantu".

AstraZeneca imaze iminsi mu bibazo n’ibihugu bigize Umuryango w’Ubumwe bw’u Burayi (EU) nyuma y’uko itangaje ko mu nkingo miliyoni 300 yari yemeye kuzaha Umugabane w’u Burayi, izatangamo miliyoni 50 gusa bitewe n’ibibazo byagaragaye ku nganda zarwo ziri mu Buholandi n’u Bubiligi.

Ibyo bibazo byagaragaye ku nganda za AstraZeneca, bishobora kuzatinza inkingo mu gihe kingana n’amezi abiri, nk’uko ubuyobozi bw’uru ruganda buherutse kubitangaza.

Ku rundi ruhande, byitezwe ko umubare w’inkingo za Pfizer-BioNTech na Moderna zizatangwa mu Burayi uzagabanuka ndetse nka Espanye yo yamaze gutangaza ko ibikorwa byo gukingira Coronavirus bizatangira mu byumweru bibiri nyuma y’igihe cyari cyarateganyijwe.

Urukingo rwa AstraZeneca rwaketsweho kudatanga ubwirinzi buhagije ku bantu bakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .