Trump yavugirijwe induru ubwo yatangiraga kwibasira Hillary bari bahuriye mu birori

Yanditswe na Philbert Girinema
Kuya 21 Ukwakira 2016 saa 10:14
Yasuwe : XX
0

Umuherwe Donald Trump wiyamamariza kuyobora Leta Zunze Ubumwe za Amerika yavugirijwe induru n’abantu bari bitabiriye ibirori ngarukamwaka bitegurwa na Kiliziya Gatolika nyuma yo gutangira kwibasira Hillary Clinton bari babihuriyemo.

Ibi birori byitwa Al Smith byabaye ku wa Kane, bigamije gukusanya inkunga izakoreshwa mu bikorwa by’urukundo aho uwabyitabiriye wese yishyura nibura amadorali 3000.

Ubwo yafataga ijambo, Trump yatangiye kubaza uburyo Hillary Clinton yatumiwe avuga ko nta kabuza yabimenye biturutse ku rubuga rwa WikiLeaks rwigeze gushyira hanze amabanga y’ishyaka ry’aba-démocrate uriya mugore abarizwamo.

Ati “Ntabwo nari nzi neza ko Hillary ari bugere hano iri joro, kubera ko, ndakeka mutarigeze mu mwoherereza ubutumire kuri email. Cyangwa niko mwabigenje abimenye biturutse ku matsiko ya WikiLeaks. Hari byinshi twamenye tubikesha WikiLeaks. Urugero tuzi ko Hillary yemera ko ari ingenzi kujijisha abaturage hashyirwaho gahunda rusange itandukanye na gahunda we bwite akurikiza.”

Ubwo yavugaga ibi abantu basaga 1500 bari bitabiriye ibi birori bahise bamuvugiriza induru maze nawe yungamo avuga ko atazi niba ari we bayivugirije cyangwa ari Hillary.

Ati “Ntacyo bitwaye, sinzi uwo murakariye niba ari Hillary, wowe cyangwa njyewe. Urugero ari hano iri joro, mu bantu ashaka kwerekana ko atanga abanyagatolika.”

CNN ivuga ko nyuma yo kumushinja kwanga abanyagatolika, yanagarutse ku buryo yakoresheje mudasobwa ye bwite mu kubika amabanga y’akazi n’ukuntu WikiLeaks yashyize hanze ubutumwa bw’ishyaka ry’aba- démocrate.

Clinton nawe ntiyabyihanganiye kuko ubwo yafataga ijambo yahise atangira kwibasira Trump avuga ko iyo yitegereje ikibumbano cy’umugore gishushanya ubwigenge (Statue of Liberty) nta kindi atekereza uretse kuba cyahindura imisatsi.

Yakomeje asa n’utebya amucyurira ku mubano we na Perezida w’u Burusiya Vladimir Putin, anagaruka ku buryo impapuro zigaragaza ko ubuzima bwa Trump bwifashe nta makuru ahagije zari zikubiyemo.

Ati “Donald afite ubuzima bwiza nk’ubwindogobe, murabizi, imwe Vladimir Putin akunze kugendaho.”

Ubwo yarangizaga kuvuga Trump yahise umukomera amashyi ndetse amubwira ko akoze akazi keza.

Uku gusererezanya hagati y’aba bakandida bombi byabaye nyuma y’umunsi umwe Trump aciye amarenga ko naramuka atsinzwe amatora ashobora kutemera ibyayavuyemo.

Ni mu gihe kandi habura ibyumweru bitatu ngo amatora abe kuko ateganyijwe ku itariki ya 8 Ugushyingo 2016.

Trump yavuze ko atari aziko Hillary bari buhurire muri ibi birori
Amagambo ya Trump yasekeje abantu benshi
Hillary Clinton yari yasazwe n'ibyishimo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE