USA: Trump yasabye ko we na Hillary Clinton bapimwa ibiyobyabwenge

Yanditswe na Uwishyaka Jean Louis
Kuya 16 Ukwakira 2016 saa 12:54
Yasuwe : XX
0

Donald Trump wiyamamariza kuyobora Leta Zunze Ubumwe za Amerika agendeye ku buryo Hillary Clinton bahanganye yitwaye mu kiganiro mpaka giheruka aho ngo yari afite akanyamuneza kadasanzwe, yasabye ko bombi bapimwa ibiyobyabwenge mbere y’ikiganiro gitaha.

Mu bikorwa byo kwiyamamaza muri Leta ya New Hampshire, Donald trump yavuze ko Hillary Clinton mu biganiro biheruka yari anezerewe, maze asaba ko bapimwa ibiyobyabwenge bombi, nubwo nta kindi kimenyetso yatanze gishyigikira ubusabe bwe.

Yongeye kuvuga kandi ko aramutse atorewe kuba Perezida wa Leta Zunze Ubumwe za Amerika yazafunga Hillary Clinton, anavuga ko nta bushobozi afite bwo kuyobora Amerika.

Yakemanze uburiganya mu mitegurire y’amatora

Mu ijambo rye Donald Trump, yakunze kwitsa ku kuba amatora y’Umukuru w’Igihugu yabamo uburiganya, aho akeka ko ibitangazamakuru bishobora gutuma atagenda neza bitewe no kumushinja ibinyoma ku mpamvu za ruswa.

Gusa ibi bisa n’ibyavugurujwe na Paul Ryan, umwe mu bayoboke b’ishyaka ry’Aba-Républicain , wavuze ko bizeye neza ko amatora azaba mu mucyo.

Uyu mugabo usanzwe unayobora Inteko Ishinga Amategeko umutwe w’Abadepite muri iki gihugu, yatangaje ko atazigera ashyigikira Donald Trump kabone n’ubwo baturuka mu ishyaka rimwe.

Hagati aho, abamamaza Clinton bavuga ko ihohoterwa rishingiye ku gitsina abagore bashinja Trump, rizafasha uwo Hillary abasha gukora amateka agatorerwa kuba Umukuru w’Igihugu.

Donald Trump aherutse gushinjwa kuvuga amagambo y’urukozasoni ku bagore ndetse no gushaka gufata bamwe muri bo ku ngufu, aho urugero ruheruka ari urwa Cathy Heller, wavuze ko Trump yamusomye ku ngufu ubwo bari bahuriye mu munsi w’abagore, i Florida mu myaka 20 ishize.

Itora ryakozwe hagamijwe kugaragaza ishusho y’ibizava mu matora, ryagaragaje ko Donald trump yatakaje icyizere ahantu h’ingenzi mu hitezwe ko yakura intsinzi, banagaragaza ko azatsinda ku majwi 40% mu gihe Hillary Clinton we bamuhaye amajwi 49%.

Ikiganiro mpaka cya nyuma cyitezwe kuba ku wa Gatatu tariki ya 19 Ukwakira 2016, mbere y’uko amatora nyir’izina aba ku wa 8 Ugushyingo uyu mwaka.

Trump yasabye ko we na Clinton babanza gupimwa ibiyobyabwenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza