Trump ashobora kwemeza Yeruzalemu nk’umurwa mukuru wa Israel

Yanditswe na David Eugène Marshall
Kuya 3 Ukuboza 2017 saa 11:41
Yasuwe :
1 0

Umwe mu bakozi bakuru mu Biro by’Umukuru w’Igihugu muri Leta Zunze Ubumwe za Amerika utashimye ko amazina ye atangazwa ,ku wa Gatanu tariki ya 1 Ukuboza 2017, yatangaje ko Donald Trump ashaka kwemeza Yeruzalemu nk’umurwa mukuru wa Israel imbere y’amategeko ya Amerika.

Reuters yatangaje ko iki gikorwa giteganyijwe mu cyumweru gitaha. Kwemera Yeruzalemu nk’umurwa mukuru wa Israel ni kimwe mu bintu byitezweho guteza impagarara hagati y’Abarabu n’Abayahudi muri rusange, bawufataga nk’umwe mu mijyi mitagatifu y’idini ya Islam nyuma ya Medina na Mecca ibarizwa muri Arabia Saoudite.

Abategetsi hafi ya bose bagiye bayobora Amerika, bagendaga bahura n’ihurizo ryo gukemura impagarara zaterwaga n’amakimbirane y’ukutavuga rumwe ku miterere y’ikibazo cy’uyu mujyi, ahora hagati y’abaturage ba Palestine bakoresha umujyi wa Yeruzalemu y’uburasirazuba nk’ubutaka bwabo,hamwe n’abayahudi bahorana inzozi zo kuwiharira.

Leta ya Israel ubusanzwe igira ihame rivuga ngo ‟Yeruzalemu ni umujyi utabasha kugabanywamo kabiri ibihe byose″, ibyo ariko bikaba mu gisa n’amarenga yo kwerekana inyota iki gihugu gihorana yo kwigarurira uyu mujyi burundu ,nyuma yo kunanirwa kuwugenzura binyuze mu nzira ya dipolomasi isanzwe ,kubera ko umuryango mpuzamahanga wagiye wamagana Israel ku bw’uyu mugambi.

Imwe muri politiki yatumye uyu mukandida w’ishyaka ry’aba Républicain yigarurira Abanyamerika bo mu muryango mugari w’abayahudi kugira ngo bamugirire icyizere, kwari ukubabwira ko azategeka ko ibiro by’uhagarariye Amerika muri Israel bivanwa i Tel-Aviv, bikimukira i Yeruzalemu, atitaye ku makimbirane bizateza.

Uburyo umujyi wa Yeruzalemu utegekwa n’ibihugu bibiri biwiyitirira bitavuga rumwe ni ikibazo gikunze guteza impagarara mu burasirazuba bwo hagati kurusha ibindi.

Gusa abakurikiranira hafi ibibera mu Burasirazuba bwo hagati, bemeza ko iyi gahunda ya Donald Trump, ica amarenga y’igishobora gukurikiraho,bamwe bakeka ko byazaba kwimurira i Yeruzalemu ibiro by’uhagarariye Amerika nubwo aya makuru ataremezwa n’inzego zibishinzwe.


Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza