Shimon Peres wabaye Perezida wa Israel yitabye Imana ku myaka 93

Yanditswe na Philbert Girinema
Kuya 28 Nzeri 2016 saa 07:21
Yasuwe :
0 0

Shimon Peres wigeze kuba Perezida wa Israel ndetse na Minisitiri w’Intebe inshuro ebyiri yikurikiranya yitabye Imana ku myaka 93 azize uburwayi.

Peres ufatwa nk’umwe mu bashinze Leta ya Israel mu 1948, yishwe n’uburwayi bwo kuva amaraso mu bwonko. Tariki ya 13 Nzeri 2016 nibwo yajyanywe kwa muganga igitaraganya.

Yaguye mu bitaro biri hafi y’Umujyi wa Tel Aviv ku wa Gatatu mu gitondo, umuryango we umuri iruhande.

Peres yavutse mu 1923 i Vishnyeva muri Belarus ahahoze ari muri Pologne, yinjira mu Nteko Ishinga Amategeko ya Israel mu 1959.

Yabaye Minisitiri w’Intebe wa Israel inshuro ebyiri ndetse aba Perezida wa cyenda wa Israel kuva mu 2007 kugeza mu 2014.

Uyu mugabo wamaze imyaka 66 muri politiki, yakoze muri guverinoma 12 ndetse agira n’uruhare runini mu gushaka umubano mwiza hagati ya Israel na Palestine.

Mu 1994 yahawe igihembo cyitiriwe Nobel kubera uruhare rwe mu isinywa ry’amasezerano y’amahoro hagati y’ibihugu byombi mu 1993. Igihembo yakiriye ari kumwe n’uwari Minisitiri w’Intebe wa Palestine, Yitzhak Rabin na Yasser Arafat wari Perezida.

Yaharaniye umubano mwiza hagati y’ibihugu byombi ndetse yigeze gutangaza ko Palestine ari umuturanyi wa hafi wa Israel bityo bagomba no kuba inshuti zikomeye.

Nk’uko BBC dukesha iyi nkuru ibitangaza, abo mu muryango we bavuga ko yatabarutse atabanje kubabara cyane.

Umuhungu we, Chemi Peres yavuze ko se yatangiye gukorera abanya Israel na mbere y’uko bagira igihugu cyabo bwite ndetse akaba yarakundaga kuvuga ko kuba ukomeye bituruka ku cyo uharanira.

Minisitiri w’Intebe wa Israel, Benjamin Netanyahu, nawe yatangaje ko yababajwe n’urupfu rw’uyu mukambwe wari ukunzwe n’igihugu cyose.

Abinyujije ku rukuta rwe rwa Twitter, Minisitiri w’Ububanyi n’Amahanga w’u Rwanda, Louise Mushikiwabo yifatanyije n’umuryango wa Shimon Peres n’abanya Israel bose.

Indwara y’ubwonko yahitanye Shimon Peres n’imwe mu zica abantu benshi ku isi, muri Amerika iza ku mwanya wa gatanu aho buri minota ine ihitana umuntu, muri Afurika iza ku mwanya wa gatatu.

Iyi ndwara iterwa no kwangirika kw’imitsi ijyana amaraso mu bwonko, ifata abantu basaga ibihumbi 800 ku isi buri mwaka kandi buri masegonda 40 umuntu umwe arayandura.

Muri Kamena 2013, Perez akiri Perezida, yakiriye mugenzi we w’u Rwanda Paul Kagame

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244