00:00:00 IGIHE NETWORK KN KINYARWANDA EN ENGLISH FR FRANCAIS

Perezida wa Afghanistan yahunze igihugu

Yanditswe na Ndahayo Emmanuel
Kuya 15 Kanama 2021 saa 04:49
Yasuwe :
0 0

Perezida Ashraf Ghani wayoboraga Afghanistan kuva mu 2014, yemeye kwegura nyuma yo kotswa igitutu n’umutwe w’Aba-Taliban, wamaze kwigarurira intara nyinshi z’icyo gihugu ndetse n’Akarere ka Sarobi kari i Kabul mu Murwa Mukuru.

Perezida Ghani yahunganye na bamwe mu bantu b’inkoramutima ze, nyuma y’ibiganiro yagiranye n’umutwe w’Aba-Taliban mu gitondo cyo kuri iki cyumweru, bikarangira nta musaruro bitanze kuko uyu mutwe wamumenyesheje ko utiteguye gusangira ubutegetsi na we.

Amakuru avuga ko Perezida Ghani w’imyaka 72, yahungiye muri Tajikistan, igihugu gisanzwe gituranye na Afghanistan, nyuma yo kubona ko ingabo z’igihugu cye zidafite ubushobozi bwo gukumira Aba-Taliban bamaze kwinjira i Kabul.

Nyuma yo kuva ku butegetsi, byitezwe ko hashyirwaho Leta y’inzibacyuho iyobowe n’Aba-Taliban, aho byitezwe ko Mullah Abdul Ghani Baradar, uri mu bashinze Umutwe w’Aba-Taliban, akaba n’umwe mu bayobozi b’uyu mutwe, ari nawe wari uyihagarariye mu biganiro na Leta ya Afghanistan byaberaga muri Qatar.

Perezida Ghani yavutse ku itariki 19 Gicurasi 1949, avukira mu Ntara ya Logar, akaba akomoka mu bwoko bwa Ahmadzai.

Uyu mugabo yagiye muri Leta Zunze Ubumwe za Amerika akiri muto, ndetse niho yigiye amashuri yisumbuye, aho yize mu ishuri rya Oswego, aharangiza mu 1967. Muri kaminuza uyu mugabo yashatse kwiga Amategeko, ariko kubihindura ajya kwiga ibijyanye n’umuco.

Yaje kwiga muri Kaminuza ya ‘American University’ iri i Beirut aho yakuye impamyabumenyi mu bijyanye n’ubukungu, aharangiza mu 1973 mbere yo kujya muri Colombia University, aho yakuye impamyabumenyi y’icyiciro cya gatatu mu 1977, mbere yo kubona impamyabumenyi y’ikirenga mu 1983.

Uyu mugabo kandi yigishije muri Kaminuza ya Kabul kuva mu 1973 kugera mu 1977, ndetse no muri Kaminuza ya Aarhus yo muri Denmark mu 1997. Mu 1983, nyuma yo kubona impamyabumenyi y’ikirenga, uyu mugabo yagiye kwigisha muri Kaminuza ya California, ayivamo yerekeza muri Kaminuza izwi ku rwego rw’Isi ya Johns Hopkins University, aho yakoze kuva mu 1983 kugera mu 1991, aho yavuye ajya gukora muri Banki y’Isi.

Mu 2001, ubwo Leta Zunze Ubumwe za Amerika zari zimaze gukuraho Leta y’Aba-Taliban, Ashraf Ghani yavuye ku mwanya yakoragaho muri Banki y’Isi, asubira muri Afghanistan nyuma y’imyaka 24 yari amaze ahavuye, ajya kuba Umujyanama wa Perezida Hamid Karzai.

Ku bufatanye na Clare Lockhart, Ashraf Ghani yashinze ikigo cya ISE gitanga ubujyanama mu bijyanye no kubaka iterambere rirambye. Mu 2006 ubwo manda ya Kofi Annan wari Umunyamabanga Mukuru w’Umuryango w’Abibumbye, LONI, yarangiraga, Ghani ni umwe mu batekerejweho mu kumusimbura, ariko ntibyakunda.

Kuva mu 2002 kugera muri 2004, Ghani yabaye Minisitiri w’Ubukungu, aho yashyizeho amavugurura atandukanye arimo gukoresha ikoranabuhanga muri serivisi z’imari za Leta, kuvugurura politiki y’imisoro, gutanga raporo kuri Leta mu rwego rwo guteza imbere imikorere inyuze mu mucyo ndetse no gukoresha ingengo y’imari mu bikorwa byo kuvana abaturage mu bukene.

Yaje kuva muri iyo Minisiteri ajya kuba Umuyobozi Mukuru wa Kaminuza ya Kabul, aza kuyobora Afghanistan bwa mbere mu 2014, yongera gutorerwa kuyobora igihugu mu 2019, ariko Aba-Taliban bamukuye ku butegetsi atarangije manda ye ya kabiri.

Perezida Ashraf Ghani wa Afghanistan yeguye ku mirimo ye nyuma y'imyaka irindwi ku butegetsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .