Kwamamaza

Perezida Duterte wa Philippines yise Amerika ‘indyarya’ mu biganiro na Perezida Putin

Yanditswe kuya 20-11-2016 saa 20:17' na Rabbi Malo Umucunguzi


Perezida Rodrigo Duterte wa Philippines yikomye ibihugu byo mu Burengerazuba bw’Isi ko bihutaza ibihugu bito, mu kiganiro yagiranye na Perezida w’u Burusiya, Vladimir Putin aho bahuriye mu nama yiga ku bukungu bw’ibihugu bya Aziya na Pasifika, yaberaga i Lima muri Peru.

Perezida Duterte yashimangiye ko adahangayikishijwe n’mikoranire n’uburengerazuba bw’Isi burimo na Leta Zunze Ubumwe za Amerika, nubwo ziheruka kubona umuyobozi mushya, Donald Trump.

Yabwiye Putin ati “Mu mateka nakunze gushyirwa hamwe n’abayobozi bo mu Burengerazuba. Byari byiza igihe cyose byamaze.Muri iki gihe byo mbona ibihugu byinshi byo mu Burengerazuba bw’Isi byigirizaho nkana ibihugu bito. Kandi si ibyo gusa, bafite n’uburyarya bwinshi.’’

Nk’uko Reuters yabitangaje, Putin yashimiye Duterte ku ntsinzi yegukanye mu matora yabaye muri Gicurasi, anamushimira ko amaze gukora ibintu byinshi mu gihe gito amaze ku butegetsi, mu kubaka icyizere hagati y’u Burusiya na Philippines.

Duterte yikomye ibihugu birimo Leta Zunze Ubumwe za Amerika, ahubwo agaragaza ubushake bwo gukorana n’u Burusiya nk’uko aheruka kubigaragariza u Bushinwa.

Uyu muyobozi ukomeje kutavugwaho rumwe, yashimagije u Burusiya buri kuzamura ishoramari mu bindi bihugu, aho agaragaza ko igihugu cye cyifuza kwigenga mu bijyanye n’imikoranire n’ibindi bihugu.

Mbere yo kuva muri Peru kandi ahaberaga iyo nama, Duterte yavuze ko ashobora gukora nk’u Burusiya na we igihugu cye kikivana mu rukiko mpuzamahanga mpanabyaha, ICC, bitewe n’uko ibihugu byo mu Burengerazuba bw’isi bikomeza kumunenga mu rugamba rwe n’ubucuruzi bw’ibiyobyabwenge, aho amaze kwica abagera ku 2300 kuva yajya ku butegetsi muri Kamena.

Perezida Duterte yavuze ko u Burusiya n’u Bushinwa buramutse bwubatse imikoranire yihariye ku Isi, yaba uwa mbere mu bakwiyunga kuri ibyo bihugu bibiri by’ibihangange.

Mu nyandiko ibiro bye byashyize ahagaragara, Perezida Duterte yanenze Leta Zunze Ubumwe za Amerika zakomeje gushoza intambara mu bihugu bitandukanye ariko byarananiranye.

Ati "Basa n’abashaka gutangira intambara ariko bafite ubwoba bwo kujya ku rugamba. Ni cyo kibazo cya Amerika n’abandi.’’

"Bagiye bashoza intambara mu bihugu byinshi, muri Vietnam, muri Afghanstan nomuri Iraq… bakunda kuvuga ko iyo ubiyometseho baba bakuri inyuma.’’

Duterte kandi yashimangiye uburyo akunda imiyoborere ya Perezida w’u Bushinwa Xi Jinping n’iya Perezida Putin w’u Burusiya.

Amagambo ya Duterte akomeje guteza umwuka mubi hagati ya Phillipines na Amerika, nubwo iki gihugu kimuha inkunga ifatika mu bijyanye n’imari.

Philippines yakiriye inkunga ya miliyoni $236 yahawe na Leta Zunze Ubumwe z’Amerika mu 2015, ndetse mu 2017 byemejwe ko izahabwa izindi miliyoni $188 mu 2017, ariko ubu ntavuga rumwe n’iki gihugu kimushinja gukoresha imbaraga z’umurengera mu guhiga abacuruza ibiyobyabwenge.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved