00:00:00 IGIHE NETWORK KN KINYARWANDA EN ENGLISH FR FRANCAIS

Paul Quilès wabaye Minisitiri w’Ingabo wa François Mitterrand yitabye Imana

Yanditswe na Bukuru JC
Kuya 24 Nzeri 2021 saa 01:28
Yasuwe :
0 0

Paul Quilès wabaye Minisitiri w’Ingabo w’u Bufaransa ubwo François Mitterrand yari ayoboye iki gihugu, yitabye Imana ku myaka 79.

Amakuru y’urupfu rwa Paul Quilès yamenyekanye kuri uyu wa Gatanu tariki 24 Nzeri 2021, bitangajwe n’umukobwa we, Emmanuelle Quilès.

Emmanuelle Quilès yabwiye Ibiro Ntaramakuru by’Abafaransa ko “se yitabye Imana mu gitondo cyo kuri uyu wa Gatanu i Paris”, yavuze ko se ari umuntu waranzwe n’imbaraga mu buzima bwe bwose, yemeza ko yanatabarutse agikomeye.

Paul Quilès yamenyekanye muri politiki y’u Bufaransa ubwo yari we uhagarariye ibikorwa byo kwiyamamaza kwa François Mitterrand, ndetse biza kurangira muri Gicurasi 1981 atsindiye kuyobora u Bufaransa.

Ku butegetsi bwa François Mitterrand, uyu mugabo yagiye ahabwa inshingano zitandukanye zirimo kuba Minisitiri w’Ubwikorezi, umwanya yagiyeho mu 1984 awuvaho mu 1985 aza kuwusubiraho mu 1991 kugeza mu 1992. Yanabaye kandi Minisitiri w’Ingabo kuva mu 1985 kugeza mu 1986.

Mu 2012 uyu mugabo yigeze kuvuga ko uburangare Umuryango w’Abibumbye wari urimo kugaragaza mu bibazo byaberaga muri Syria busa n’ubwabaye ubwo imbaga yatikiraga muri Jenoside yakorewe Abatutsi mu 1994.

Yavuze ko mu 1998, ubwo yari ayoboye umutwe ushinzwe itumanaho mu Nteko Ishinga Amategeko y’u Bufaransa, yiboneye raporo yo kuwa 31 Gicurasi 1994 ya Boutros Boutros-Ghali, Umunyamisiri wari umunyamabanga w’Umuryango w’Abibumbye mu gihe cya Jenoside, aho yavugaga ko umuryango mpuzamahanga ayoboye wagaragaje intege nke mu gutanga ubutabazi bwihuse mu guhangana n’interahamwe zarimo zica Abatutsi ariko agashimangira ko ari ikosa ry’ubushake buke bwa Politiki.

Paul Quilès kandi mu 1997 yagizwe Umuyobozi wa Komisiyo y’Inteko Ishinga Amategeko yagombaga gucukumbura uruhare rw’u Bufaransa mu Rwanda.

Abanyarwanda bari biteze ko iyo Komisiyo igiye kugaragaza ukuri ku ruhare rw’u Bufaransa mu Rwanda ariko si ko byagenze. Raporo y’iyo Komisiyo yasohotse mu Ukuboza 1998 ivuga ko nta ruhare rugaragara u Bufaransa bwabigizemo uretse ‘amakosa yo kudashishoza’.

Paul Quilès wabaye Minisitiri w’Ingabo wa François Mitterrand yitabye Imana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .