Papa Francis yasezeranyirije abageni mu ndege ye mu buryo butunguranye

Yanditswe na Mukaneza M.Ange
Kuya 19 Mutarama 2018 saa 10:57
Yasuwe :
0 0

Umushumba wa Kiliziya Gatolika ku Isi, Papa Francis, yatunguye benshi ubwo ku wa Kane yasezeranyirizaga mu ndege yari imutwaye umugore n’umugabo bari basanzwe babana, mu muhango utari wigeze utegurwa wabereye mu kirere muri kilometero zisaga 10 uvuye ku butaka bwa Chile.

Abayobozi muri Vatican batangaje ko ari bwo bwa mbere mu mateka Papa atangiye isezerano ryo gushyingirwa mu ndege imutwaye.

Papa Francis yafashe umwanzuro wo gusezeranya, Paula Podest Ruiz na Carlos Ciuffardi Ellorriaga basanzwe bakora mu ndege, ubwo bamwicaraga iruhande hagiye gufatwa ifoto y’urwibutso y’itsinda ryose bagatangira kuganira na we.

Papa wavaga mu Mujyi wa Santiago yerekeza mu wa Iquique yababajije niba barashyingiranwe, abandi bamubwira ko basezeranye imbere y’amategeko ariko ntibabashe kujya imbere y’Imana bitewe n’umutingito wabaye muri Chile mu 2010 ugasenya kiliziya yagombaga kuberamo uyu muhango.

Aba bombi basanzwe bafitanye abana babiri babwiye CNN n’abandi banyamakuru bari mu ndege ko Papa ariwe wagize igitekerezo cyo kubasezeranya ndetse ababaza niba koko biteguye.

Bakomeje basobanura ko yahise ahesha umugisha impeta zabo, ndetse Umuyobozi mukuru wa Sosiyete y’indege yari ibatwaye akaba ariwe wabaye umuhamya w’isezerano ryabo.

Nyuma yahise asaba aba karidinali bari kumwe nawe kwandika n’intoki urupapuro ruhamya ko basezeranye imbere y’Imana, rusinywaho na Papa Francis, abasezeranye ndetse n’uwabaye umuhamya.

Ciuffardi n’umugore we Ruiz bavuze ko nyuma yo kubasezeranya, Papa yababwiye ko isakaramentu ry’ugushyingirwa ariryo ribura ku isi, ariko yizeye ko ibyo akoze bizagira impinduka ku mitekerereze y’abakundana bari mu bihugu bitandukanye.

Aba bombi bahawe impano z’ishapure y’umweru ku mugore n’umukara ku mugabo bateganya gukora ibirori bakishimana n’inshuti zabo.

Papa Francis yasezeranyirije abageni mu ndege ye mu buryo butunguranye
Paula Podest na Carlos Ciuffardi mu byishimo nyuma yo guhabwa isakaramentu ry'ugushyingirwa
Paula Podest w’imyaka 39 n’umugabo we Carlos Ciuffardi ufite 41 bagiye guhita bajya mu kwezi kwa buki
Aba bombi bamaranye imyaka isaga 10 babana nk'umugabo n'umugore basezeranye imbere y'amategeko
Podest na Ciuffardi bafitanye abana babiri barimo Rafaela w'imyaka itandatu na Isabela ufite itatu
Umukono wa Papa Francis asinyira abageni icyangombwa kigaragaza ko bashyingiwe muri Kiliziya Gatolika

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza