Obama yagejeje ijambo rya nyuma nka Perezida ku Nteko rusange ya Loni

Yanditswe na Jean Pierre Tuyisenge
Kuya 21 Nzeri 2016 saa 07:35
Yasuwe : XX
0

Perezida wa Leta Zunze ubumwe za Amerika, Barack Obama, yasabye abategetsi b’Isi kugira umutima utekereza ku mibereho impunzi zirimo bagahindura imibereho zirimo muri iki gihe.

Ibi Barack Obama yabivuze mu Nteko Rusange y’Umuryango w’Abibumbye yateraniye i New York muri Leta Zunze Ubumwe za Amerika ari nayo ya nyuma yitabiriye nk’Umukuru w’Igihugu dore ko azarangiza manda ye tariki ya 20 Mutarama 2017.

Perezida Obama yasabye abayobozi gutekereza ku buzima impunzi zibayemo hakagira igikorwa. Ati “Twese hamwe dukwiye gufungura imitima yacu tugafasha impunzi zataye ingo zazo.”

BBC dukesha iyi nkuru ivuga ko Perezida Obama yasabye abategetsi b’ibihugu kwirinda umuco yise mubi ngo umaze gukwira mu Leta Zunze Ubumwe za Amerika n’ahandi ku Isi, aho ngo usanga itsinda ry’abantu bake ryarashyize abaturage mu kiganza cyaryo.

Ibi Obama abivuze mu gihe Umuryango w’Abibumbye ubarura impunzi zigera kuri miliyoni 21.3 ku Isi yose zahunze intambara n’itotezwa mu bihugu ngo akenshi usanga bituruka ku nyungu z’abantu bake.

Yabwiye abari mu Nama y’Umuryango w’Abibumbye ko Isi ishobora kugira amahoro gusa ari uko hakuweho igitera ubuhunzi.

Ijambo rya Obama rije nyuma y’umunsi umwe Leta Zunze Ubumwe za Amerika n’u Burusiya banze kumvikana ku guhagarika intambara muri Syria, biturutse ku bitero by’indege byagabwe n’Ingabo za Amerika ku basirikare ba Leta ya Syria.

Obama yaboneyeho gukoresha imbwirwaruhame ye ya munani, mu nama y’Umuryango w’Abibumbye ari nayo ya nyuma ari Perezida wa Leta Zunze Ubumwe za Amerika , ahamagarira abakuru b’ibihugu byo muri uwo muryango kwirinda ko amakimbirane yacamo Isi ibice.

Yagize ati “Tubwizanyije ukuri, mu gihe nibura ibibazo by’ibanze bitari byasubizwa by’uko imiryango yakomeza gukorana uko bikwiye, ba nyamwigendaho bazakomeza kugwira, ikiremwamuntu kizakomeza kuhazaharira.”

Nubwo atavuze yeruye amazina y’ibihugu, Perezida Obama yavuze ko ibihugu bikomeye bikwiye gukora byinshi bigafasha impunzi.

Yakomoje no kuri gahunda ya Donald Trump wiyamamariza kuyobora Amerika yo kubaka urukuta rutandukanya Leta Zunze Ubumwe za Amerika na Mexique mu rwego rwo gukumira abimukira binjira muri Amerika, aho yavuze ko “bidakwiye kubaka urukuta ruzagira ingaruka ku baturage b’abanyamerika ubwabo”.

Umunyamabanga Mukuru w’Umuryango w’Abibumbye Ban Ki moon we yari yavuze ko ikibazo cyo muri Syria kidakwiye gukemurwa n’imbaraga za gisirikare.

Umuryango w’Abibumbye muri raporo y’umwaka wa 2016, watangaje ko ukomerewe n’ubwiyongere bukabije bw’impunzi ku Isi, aho uvuga ko umubare wazo udahuye n’ubushobozi ufite bwo kuzitunga.

Perezida Barack Obama yasabye abayobozi guhagurukira ikibazo cy'impunzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza