Niyonzima yajyanye Canada mu nkiko asaba indishyi ya miliyoni $50 kubera iyicarubozo yakorewe

Yanditswe na Evariste Nsengimana
Kuya 10 Ugushyingo 2018 saa 12:03
Yasuwe :
0 0

Niyonzima Prosper yajyanye Leta ya Canada mu nkiko asaba indishyi ya miliyoni $50 ku iyicarubozo yakorewe, ubwo hasuzumwaga niba yirukanwa ku butaka bw’icyo gihugu, akabuzwa uburenganzira bwo kwivuza ihungabana.

Niyonzima w’imyaka 36 wavukiye i Burundi, ababyeyi n’abavandimwe be bicwa muri Jenoside yakorewe Abatutsi mu Rwanda mu 1994. Yagiye muri Canada nk’impunzi mu 1995 afite imyaka 13, aza guhabwa uburenganzira bwo gutura.

Nk’uko ikinyamakuru The Star cyabitangaje, kubera uburyo yagiye agaragara mu byaha bitandukanye birimo ubujura n’ibiyobyabwenge ndetse agafungwa inshuro nyinshi, mu 2005 yambuwe uburenganzira bwo gutura muri Canada.

Yahawe imyaka itanu mbere yo koherezwa mu Burundi aho yavukiye, ari nayo yahuyemo n’umugore muri Canada, bakabyarana umwana mu 2009.

Yaje gusubira mu byaha arafungwa, arekuwe mu 2010 abaganga basanga afite ibibazo by’ihungabana akomora ku rupfu rw’umuryango we, nk’uko ikirego yatanwe kibivuga.

Kongera gufungwa byatumye Niyonzima bamwambura uburenganzira bwo kuba muri Canada, ndetse ku wa 13 Mutarama 2012 inzego zishinzwe abinjira n’abasohoka zimuta muri yombi ategereje umwanzuro umusubiza mu Burundi.

Muri Nyakanga 2013 Niyonzima ari muri kasho, umwana we yahawe undi muryango ngo umurere, bituma Se arushaho guta umutwe, batangira kumucungira hafi ngo hato ataziyahura.

Mu kirego cyashyikirijwe urukiko kuri uyu wa Gatanu, Niyonzima yavuze ko yafunzwe imyaka hafi itanu, harimo ibiri yamaze afungiye ahantu ha wenyine, ndetse ubuyobozi bwanga ko ahura n’abaganga bashobora kumufasha.
Ibyo ngo byatumye arushaho kugira ikibazo cyo mu mutwe. Nyuma ubuyobozi bwaje kumwohereza kwivuza bitegetswe n’urukiko, ariko bikorwa mu buryo bubabaje hakoreshejwe amashanyarazi, ibintu butamufashije bijyanye n’ikibazo yario afite.

Ahubwo ngo “byazuye ihungabana akomora kuri Jenoside, yaguyemo ababyeyi be n’abavandimwe be batatu.”

Aho kumufasha ngo bamufungiye wenyine, bamwima uburenganzira bwo kwambara bikwiye, kuvurwa, ibiribwa n’isuku ihagije. Ikirego gikomeza kivuga ko yahawe inshuro eshatu zonyine zo gukaraba mu mwaka wose.

Leta y’icyo gihugu yahawe iminsi 20 ngo igaragaze ubwiregure bwayo.

Niyonzima yaje kurekurwa by’agateganyo mu Ukwakira 2016, ndetse ahabwa imyaka itatu yo gutura by’agateganyo, anemererwa ko ashobora gusaba gusubizwa uburenganzira bwo gutura igihe yaba atagikurikiranywe n’amategeko.

Itegeko rya Canada rishinzwe abinjira n’abasohoka riteganya ko umuntu ufungiwe kutagira ibyangombwa byo gutura, buri minsi 30 ajya gusaba niba yarekurwa, ariko umwunganizi wa Niyonzima, Subodh Bharati yavuze ko umukiliya we amaze gusaba inshuro 60 nta gikorwa.

Niyonzima Prosper yajyanye Leta ya Canada mu nkiko asaba indishyi ya miliyoni $50 ku iyicarubozo yakorewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza