Kwamamaza

Ni iki igihugu kitorohewe n’intambara nka Iraq gishobora kwigira ku Rwanda?

Yanditswe kuya 27-09-2016 saa 12:06' na Rabbi Malo Umucunguzi


Mu bihe bikomeye bya Jenoside yakorewe abatutsi mu 1994 yahitanye abagera kuri miliyoni mu minsi 100, bamwe bakicwa urubozo n’abaturanyi babo, bazira ubwoko na bo batihaye cyangwa ngo bahitemo, hari zimwe mu mpamvu zayitije umurindi ndetse zigihabwa intebe mu bindi bihugu, birimo Iraq.

Umwanditsi Noel Brewer Yeatts, yifashishije ikinyamakuru Christian Post, avuga ko nyuma y’icyo gikorwa ndengakamere Umuryango Mpuzamahanga wakoresheje ijambo “Jenoside” nk’uko byakozwe ku bwicanyi bwakorewe Abayahudi, kimwe n’ijambo “ntibizasubire ukundi” ariko ngo hari henshi n’uyu munsi hagitutumba ibikorwa bishobora kugera kuri Jenoside.

Ati “Uyu munsi tubona Jenoside zikorwa ku mateleviziyo yacu. Muri uyu mwaka Umunyamabanga wa Leta ushinzwe ububanyi n’amahaga (muri Leta Zunze Ubumwe za Amerika), John Kerry, yemeje ko umutwe wiyitirita Leta ya kiyisilamu (ISIS) iri gukorera Jenoside aba Yazidi, Abakirisitu n’andi moko mato mato muri Iraq (na Syria). Ijwi rye ryunzwemo n’Abadepite benshi mu Nteko Ishinga amategeko na Sena ya Amerika, kimwe n’abadepite bo mu Bwongereza.”

Uyu mugabo yibaza ukuntu igihugu nka Iraq gishobora kuva muri ibyo bikorwa byibasiye ikiremwa muntu, ariko ngo gutera akajisho ku ntambwe z’u Rwanda nyuma ya Jenoside hari icyo byayifasha.

Nyuma y’imyaka isaga 20 u Rwanda ruvuye muri Jenoside, ruratera imbere byihuse ndetse rumaze kugira ijambo muri Afurika.

Noel avuga ko hagati ya 2001 na 2014, u Rwanda rwigaragaje nk’igihugu gifite ubukungu bwihuta cyane muri Afurika, ndetse ibigo mpuzamahanga bigahatanira gushora imari mu bijyanye n’ikoranabuhanga ari na ko bihanga imirimo mu Rwanda.

Ati “Imihanda mu Murwa Mukuru Kigali irasukuye kandi inyurwamo n’imodoka zitwara abantu zigezweho zirimo internet yihuta ya 4G y’ubuntu. Imfu z’abana zagabanutseho bibiri bya gatatu. Mu myaka itanu gusa, igipimo cy’ubukene cyagabanutseho 14%. Abazi gusoma no kwandika, Abatangira amashuri abanza no kugezwaho serivisi z’ubuzima byose byarazamutse. Ikidasanzwe ni uko abakoze Jenoside n’abayirokotse mu 1994 ubu baturanye mu mahoro, ndetse abana babo baranashyingiranwa.”

Hari amasomo atatu Iraq yakwigira ku Rwanda

Nubwo ibibazo byabaye mu Rwanda bitandukanye n’ibyugarije uburasirazuba bwo hagati, byose bihurira ko ari amashami y’amakimbirane, nubwo mu Rwanda byashingiye ku moko muri Iraq ho ikibazo kikaba kiri kugirwa idini, ariko ibisubizo byabyo birasa.

1. Gukuraho amoko mu ndangamuntu

Jenoside yakorewe Abatutsi yabibwe mu rwangano rukomeye ndetse bitwarwa no mu mirongo ya politiki. Nyuma ya Jenoside, guverinoma y’u Rwanda yakoze ibishoboka mu gukuraho ibintu byose bijyanye n’amoko byatandukanyaga abanyarwanda, aho uyu munsi nta Hutu, Tutsi cyangwa Twa bigaragara mu ndangamuntu, mu gihe mbere byari byarashyizwemo ndetse bigahabwa agaciro gakomeye, ariko ubu bose bakaba ari ‘Abanyarwanda’.

Noel ati “Iraq ni uruhurirane rw’amoko n’amadini. Hari imirongo ntarengwa hagati y’Abarabu n’aba kiride (Kurds), ndetse no hagati y’Abakirisitu n’Abasilamu kimwe n’aba Yazidi (mvuzemo bake).”

“Ibihugu by’ubu ntabwo bigizwe n’ubwoko bumwe cyangwa idini rimwe; ni uruhurirane rw’abantu batandukanye bakagira indangamuntu nk’ikintu bahuriyeho. Iraq ifite inzira ndende kandi y’inzitane iri imbere, ariko nibura gukura amadini n’amoko mu ndangamuntu bishobora gushyira Iraq mu cyerekezo kizima.”

2. Gushakira ubutabera mu nzego z’ibanze aho kuba igisirikare

Mu gutanga ubutabera ku bihumbi by’abantu bashinjwaga gukora Jenoside, guverinoma y’u Rwanda yasubiye kuri gakondo mu Nkiko Gacaca, imanza zicibwa n’Inyangamugayo zo mu baturage, uwemeye icyaha agasaba imbabazi akagabanyirizwa ibihano, hagashyirwa imbere kunga imiryango.

Imbabazi zarasabwaga kandi zitagangirwa mu ruhame, hagasubiranywa imibanire hagati y’abakoze Jenoside n’abagizweho ingaruka na yo.

Noel ati “Muri ubwo buryo, igisirikare ntabwo gishobora guhatira abantu gutanga imbabazi cyangwa kuzakira muri Iraq. Ni ibintu bishobora gukorerwa mu miryango, ari naho hantu nyaho guhindura indangamuntu z’igihugu bitangirira. Kongerera ubushobozi imiryango y’abanya-Iraq ngo ibashe gutanga ubutabera byabafasha kwiyumvamo inshingano zo kongera kubaka igihugu cyabo.”

3. Kwimakaza ubutabera bwunga

“Ikintu gikomeye cyazanywe n’inkiko Gacaca ni uko abakoze ibyaha bahawe kudakora ibihano bakatiwe gusa, ahubwo no gukorera icyiza imiryango bahemukiye. Umuhutu wishe umututsi agasiga umugore, akazagaruka kumusanira inzu. Ibintu nk’ibyo byafashije u Rwanda kugera ku bwiyunge mu gihe nta watekerezaga ko byashoboka.”

Noel yakomeje agira ati “Ku byaha bikorwa muri Iraq, nta gihano gishobora kugarura ibyangiritse byose. Ubwo butabera ntabwo bwahanagura ibyabaye byose, ariko byaba intambwe ya mbere ku bakoze ibyaha bakongera kwiyumvamo ubumuntu, n’ababikorewe bakabohoka urwango n’agahinda. Byafasha Iraq gutangira gukira ibyo bikomere.”

Uyu mwanditsi akomeza avuga ko mu Rwanda abayobozi b’amadini bagize uruhare muri uru rugendo rw’ubwiyunge, ku buryo ukwemera abantu badahuje badakwiye kugufata nk’ikibazo ahubwo ari igisubizo kuri bo.

Uyu munsi ngo ahantu hari imivu y’amaraso mu duce tw’urupfu ubu habaye aho kuronkera ubuzima, ndetse ibikoresho byifashishijwe mu kwica muri Jenoside ubu birakoreshwa mu mirimo yagenewe ubuhinzi n’ubworozi, ndetse abaturage bose barangamiye ahazaza habo.

Noel kandi yavuze ko Iraq igendeye ku nzira u Rwanda rwanyuzemo, yakwivana mu bibazo nk’uko u Rwanda ruri kugenda rurenga ibihe bikomeye rwanyuzemo, kandi bikagaragaza ko igihugu kidashobora kuzimira mu gihe abaturage bashaka kwima umwanya ibibatandukanya ku neza y’ahazaza habo.

Komisiyo y’igihugu y’ubumwe n’ubwiyunge mu Rwanda iheruka gutangaza ko hagendewe ku bushakashatsi ku ku bipimo by’ubumwe n’ubwiyunge mu 2015(Rwanda Reconciliation Barometer 2015), igipimo cy’ubumwe n’ubwiyunge mu banyarwanda kigeze kuri 92.5%.

Igipimo cy’ubwiyunge bw’Abanyarwanda bakibona mu ndorerwamo y’amoko cyagabanutseho 10% hagati y’umwaka wa 2010 na 2015, kuko mu 2010 bari 37% mu gihe mu cya 2015 bamanutse bagera kuri 27.9%.

Iraq iri mu bihe bikomeye nyuma y’iyicwa rya Saddam Hussein wari Perezida w’iki gihugu, mu 2006, aho imitwe yitwaje intwaro ikomeje kukiyogoza.

Muri Kanama 2014 ni bwo ingabo ziyunzweho na Leta Zunze Ubumwe za Amerika zatangije ibitero by’indege kuri Islamic State, kugeza uyu munsi abamaze guhitanwa n’uyu mutwe bakaba batazwi neza, gusa Umuryango w’Abibumbye uvuga ko umaze guhitana abasivili bagera ku 23, 600 guhera muri Mutarama 2014.

Abanya Iraq bakomeje kubura abavandimwe n'inshuti zabo kubera intambara z'urudaca zibugarije

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved