Ni gute Amerika na Iran byabaye abanzi?

Yanditswe na Umwali Zhuri
Kuya 12 Mutarama 2020 saa 02:14
Yasuwe :
0 0

Hashize imyaka Iran na Leta Zunze Ubumwe za Amerika ari ibihugu birebana ay’ingwe, ndetse ubu ibintu byarushijeho kujya irudubi nyuma y’uko Qasem Soleimani ufatwa nk’intwari muri Iran yiciwe mu gitero cya drones.

Urupfu rwe rwateye ibibazo amagana ku Isi ndetse abantu benshi batangira gutekereza ko kera kabaye hashobora kubaho intambara ya gatatu y’Isi yose.

Kugira ngo wumve neza uburyo umubano wa Iran na Leta Zunze Ubumwe za Amerika, ni ngombwa ko dusubira inyuma mbere gato y’intambara ya Kabiri y’Isi yose.

Mu 1941, u Bwongereza na Leta Zunze Ubumwe z’Abasoviyete bohereje ingabo muri Iran, zinjira mu gihugu kubera ubuyobozi bwariho bwa Rezā Shāh bwari bwananiwe kurwanya ko Aba-Nazi bakomeza kugira ijambo mu gihugu.

Ibyo bihugu byahatiye Shāh kwegura. Yemeye guhara ubutunzi bwe bwose burimo miliyoni amagana z’amadolari zari kuri banki zitandukanye n’imidugudu yari afite mu bice bitandukanye by’igihugu.

Umuhungu we Mohammad Reza Pahlevi yagizwe umuyobozi ukomeye kuko byasaga n’aho ariwe ushobora gukorana n’ibihugu by’inshuti. Yaje kugirwa umuyobozi ariko nta bubasha buhagije afite.

Nyuma y’intambara, Iran yafashe umugambi wo kwirukana amahanga ku butaka bwayo, u Bwongereza bwakuyeyo ingabo ariko iza Leta zunze Ubumwe z’Abasoviyete zirahaguma.

Hakomeje kubaho ibiganiro byagejeje ku masezerano y’uko hashingwa sosiyete ihuriweho na Iran na Leta zunze Ubumwe z’Abasoviyete (URSS) igenzura ibijyanye na peteroli.

Uwari Perezida wa Amerika Harry Truman ntiyishimiye iyo mikorere, maze ingabo za URSS zemera kuvayo. Ku rundi ruhande, hari igice kinini cyamaganaga imikorere ya URSS na Iran mu kugenzura ibijyanye na peteroli.

Sosiyete yari ikomeye mu gihugu igenzura umusaruro wa peteroli yari ihuriweho n’Abongereza. Habayeho ibiganiro bigamije kongera imigabane ya Iran ariko ntibyagira icyo bitanga. Impamvu ni uko ariho u Bwongereza bwakuraga amafaranga menshi agamije gutera inkunga ibikorwa byayo nyuma y’intambara y’Isi yose.

General Haj-Ali Razmara wari waratumye u Bwongereza bugera kuri ayo masezerano yaje kwicwa, hanyuma Mohammed Mosaddeq aza kuba Minisitiri w’Intebe mu 1951. Yagiyeho u Bwongereza butabishaka na mba, byanatumye haba umvuka mubi.

Mosaddeq yahise ahagarika u Bwongereza ku kongera gucukura peteroli yo muri Iran ndetse ategeka ko imitungo yabwo ifatirwa. Ya sosiyete ya peteroli yarafunzwe, abakozi babura akazi, imishinga yo gucukura no gutunganya peteroli irahagarara hanyuma ingabo zo mu mazi z’u Bwongereza nazo zifunga ibyambu bya Iran ku buryo nta bintu byari bicyoherezwa hanze.

Ibibazo by’ubukungu byagejeje ku bibazo bya politiki. Kubera uburyo Mosaddeq yari yarabangamiye u Bwongereza, bwasabye Leta Zunze Ubumwe za Amerika umusanzu mu kumukuraho.

Mu 1953, CIA na MI6, inzego z’ubutasi mu bihugu byombi zashyigikiye coup d’etat yo gukuraho Mosaddeq hanyuma zishyiraho ubutegetsi bwa Mohammad Reza Shah.

Nawe ntiyatinze kuko yatangiye kunengwa n’abanyagihugu kubera uburyo yasesaguraga umutungo ndetse n’iyicarubozo ryakorerwaga abatavuga rumwe n’ubutegetsi bwe byatumye mu 1971 nawe akurwaho.

Yahunze igihugu ajya mu Misiri [ari naho yaguye] hanyuma Ruhollah Khomeini wari umuyobozi ukomeye mu idini ya Islam aba ariwe ufata ubutegetsi aba Umuyobozi w’Ikirenga.

Kimwe mu bintu yifashishije mu kunga abanya-Iran muri icyo gihe cyari ukubabwira ko Amerika itazongera kugira uruhare mu mibereho y’igihugu. Uku gukumira Amerika ntabwo kwagize akamaro cyane kuko mu Ukwakira 1979 byavuzwe ko Shah wa Iran (Mohammad Reza Pahlavi) yabashije kwemererwa kwinjira mu kigo cya Amerika kivura Cancer. Ibi byatumye hanze ya Ambasade ya Amerika i Tehran muri Iran haba imyigaragambyo ikomeye yamaze ibyumweru bibiri.

Mu Ugushyingo k’uwo mwaka, abigaragambya binjiye muri Ambasade bafata abantu 90 nk’imbohe barimo abanyamerika 66. Basabye Amerika ko yakohereza Shah mu gihugu.

Ibi nibyo byabaye intangiriro z’umwuka mubi. Amerika yahise itangira gucana umubano mu bya dipolomasi na Iran, ari nako iyishyiriraho ibihano bikarishye. Byaje gusa n’ibicogora ubwo Iran yemeraga kurekura imbohe zari zafashwe nayo ihabwa imitungo yari yafatiriwe.

Iminsi 444 niyo byasabye ngo Iran irekure izo mbohe ariko ibintu byari byamaze kwangirika. Mu myaka itatu yakurikiyeho, Amerika yari yamaze kwita Iran igihugu gishyigikira ibikorwa by’iterabwoba.

Mu myaka ya 1980, Iran na Iraq byararwanye, Amerika isa n’aho nta ruhande ishyigikiye ariko mu buryo bw’ibanga iri inyuma ya Saddam Hussein wayoboraga Iraq.

Mu 1988, Amerika yarashe indege ya Iran yari itwaye abagenzi aho yaje kuvuga ko yayitiranyije n’indege y’abarwanyi. Abantu 290 bari bayirimo bose barapfuye.

Mu 2002, umwaka umwe mbere y’intambara yo muri Iraq, Perezida Bush yashyize Iran mu bihugu yise “icyicaro cya sekibi” biturutse ku kuba byaravugwaga ko Iran iri gukora intwaro za kirimbuzi kugira ngo itere Amerika.

Intambara yo muri Iraq benshi bemeza ko ariyo yatumye imitwe irimo Islamic State ivuka. Uyu mutwe wabaye ikibazo ku bihugu byose, Iran yashyigikiye ibikorwa byo kuyirwanya muri Syria na Iraq, byanagizwemo uruhare na Leta Zunze Ubumwe za Amerika.

Mu 2015 ibintu byashushe n’ibihindura isura kuko Iran yasinyanye amasezerano na Amerika hamwe n’ibindi bihugu by’u Burayi yagabanyirizaga ibihano Iran nayo yemera kugabanya ibikorwa by’icurwa ry’intwaro za kirimbuzi.

Nyuma yaho Perezida Trump atesheje agaciro aya masezerano, umwuka mubi wongeye kuvuka ndetse kwica Qasem Soleimani byo byarushijeho gushyira ibintu irudubi.

Abanya-Iran biyemeje guhorera Qasem aho mu mvugo zabo bumvikanaga bagira bati "urupfu kuri Amerika"
Abanya-Iran bamaze iminsi mu kiriyo kubera urupfu rw'umugabo bafataga nk'intwari y'igihugu
Nyuma y'urupfu rwa Qasem Soleimani, Abanya-Iran bakoze imyigaragambyo ikomeye yo kwamagana Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza