NASA ikeneye miliyari 30$ zo kohereza abantu babiri ku kwezi

Yanditswe na Iradukunda Serge
Kuya 15 Kamena 2019 saa 01:49
Yasuwe :
0 0

Ikigo cy’Abanyamerika gishinzwe iby’ubumenyi bw’isanzure, NASA, cyatangaje ko urugendo rwo gusubira ku kwezi mu 2024, ruzatwara miliyari ziri hagati ya 20 na 30 z’amadolari ya Amerika.

Uru rugendo ruzatuma umugore wa mbere agera ku kwezi n’umuntu wa mbere asubireyo nyuma y’imyaka myinshi kuko biheruka mu 1969.

Umuyobozi wa Nasa, Jim Bridenstine, kuwa Kane yatangaje ko kugira ngo haboneke miliyari hagati ya 20 na 30 z’amadolari mu myaka itanu isigaye, bisaba ko buri mwaka hiyongeraho miliyari hagati y’enye n’esheshatu z’amadolari ku mwaka, ku ngengo y’imari ibarirwa muri miliyari 20 z’amadolari ku mwaka.

Ni ubwambere NASA ivuze ku ngengo y’imari uyu mushinga witiriwe Artémis (izina ry’imanakazi y’ukwezi y’Abagiriki) wo kohereza umugabo n’umugore b’abahanga mu isanzure, rukaba ari urugendo rwa mbere umugore azaba agiriye ku kwezi.

Artémis yari mushiki wa Apollo, izina ryahawe urugendo ruheruka rw’Abanyamerika bageze ku Kwezi mu 1969.

Intego y’uyu mushinga wa Artemis ni ugushyiraho uburyo bunoze buzafasha abandi bahanga mu by’isanzure kujya ku kwezi biboroheye, uyu mushinga kandi uzafasha gutegura undi umushinga wa Nasa w’igihe kirekire wo gutuza abantu ku mubumbe wa Mars, ibintu bizaba bibaye bwa mbere mu mateka ya muntu.

Umuyobozi wa Nasa yatangaje ko bigoranye kwemeza igiciro ntakuka kubera ko urugendo rugana mu isanzure rugira insanganya nyinshi ziza zitunguranye.

Yavuze ko nubwo amadorali ari hagati ya miliyari 20 na 30 ataricyo giciro cyanyuma ariko ari macye ugereranyije n’uko abantu bamwe babitekerezaga.

Perezida Donald Trump aheruka gutangaza ko ashaka miliyari $1.6 mu mwaka utaha w’ingengo y’imari kugira ngo uru rugendo rwihutishwe, ku buryo Abanyamerika bazasubira ku kwezi bitarenze 2024. Ni ingengo y’imari yiyongera kuri miliyari $21 yari yamaze gusabira NASA.

Ku wa 13 Gicurasi 2019, Trump yanditse kuri Twitter ati “Ku buyobozi bwanjye turimo kuzahura NASA ngo yongere ibe ikigo gikomeye kandi tugiye gusubira ku Kwezi dukurikizeho Mars. Ndimo kuvugurura ingengo y’imari yanjye ngo hongerwemo miliyari $1.6 z’inyongera ku buryo tuzasubira mu isanzure mu buryo bukomeye.”

Aho harimo miliyoni $651 zo kwihutisha kubaka utumodoka NASA imaze igihe ikoraho; rocket yiswe ‘Space Launch System, SLS’ izarasa icyogajuru kizavana ku Isi abazajya muri ubwo butumwa no kubaka uburyo buzabafasha kugenda ku Kwezi.

NASA kandi iri mu mushinga wo kubaka icyicaro kizashyirwamo ibikorwa byayo hafi y’Ukwezi yise Gateway, cyajya gifasha abahanga mu mirimo yabo mbere yo kujya hafi aho ku Kwezi.

Neil Armstrong niwe Munyamerika waheruka ku kwezi mu mushinga wiswe Apollo watangiye mu 1961 ukarangira mu 1975.

Urugendo rwo gusubira ku kwezi ruzatwara hagati ya miliyari 20 na 30 z'amadolari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza