Moderna yatangaje ko urukingo rwayo rushobora gukingira ubwoko bushya bwa Coronavirus

Yanditswe na Ndahayo Emmanuel
Kuya 26 Mutarama 2021 saa 01:36
Yasuwe :
0 0

Ubuyobozi bw’uruganda rwa Moderna rwatangaje ko urukingo rwa Coronavirus ruherutse gushyirwa hanze, rufite ubushobozi buhambaye bwo gukingira ubwoko bushya bwa Coronavirus bukomeje guca ibintu hirya no hino ku Isi.

Coronavirus, kimwe n’izindi virus nyinshi, igenda yihinduranya uko imara igihe mu bantu, gusa akenshi ibi ntibigira ingaruka ku miterere y’indwara iterwa n’izo virus, ku buryo nyuma y’igihe runaka, iyo ndwara ishobora kutavurwa n’imiti ndetse n’inkingo zayikorewe.

Kuri Coronavirus, nayo yakomeje kwihinduranya ariko biza gufata indi ntera ubwo hatangiraga kuboneka ubwoko bushya bw’iyi ndwara, bufite ubushobozi bwo kwandura vuba, ku kigero kiri hagati ya 50% na 70% ugereranyije n’ubwoko busanzwe, ndetse no kwica vuba ku kigero cya 30%, nk’uko biherutse gutangazwa n’inzego z’ubuzima mu gihugu cy’u Bwongereza, kiri mu byibasiwe cyane n’ubu bwoko bushya bwa Coronavirus.

Ibi kandi byatumye abantu batangira kugira impungenge z’uko izi nkingo ziri gukorwa, zishobora kutazakingira ubu bwoko bushya bwa Coronavirus, ariko ubuyobozi bw’uruganda rw’Abanyamerika rwa Moderna, bwatangaje ko mu bushakashatsi bamazemo iminsi, basanze urukingo rwabo, rushobora guhangana n’ubwoko bushya bwa Coronavirus.

Umuyobozi Mukuru w’urwo ruganda, Stephane Bancel, yagize ati "Amakuru dufite araduha icyizere cy’uko urukingo rwakozwe na Moderna rushobora guhangana n’ubwoko bushya bwa Coronavirus".

N’ubwo abahanga mu ndwara z’ibyorezo bemeza ko bigoye ko ubwoko bushya bwa Coronavirus buri kugaragara ku Isi butakizwa n’inkingo ziri gukorwa magingo aya, ngo hari amahirwe y’uko ikigero cy’ubwirinzi cy’izo nkingo gishobora kugabanuka, wenda niba urukingo runaka rutanga ubwirinzi ku kigero cya 90%, icyo kigero kikaba cyamanuka kikagera kuri 60% cyangwa 70%.

Visi Perezida wa ’BlueWillow Biologics’, Ikigo gikora ubushakashatsi ku nkingo ku rwego rw’Isi, yagize ati "ntabwo tuzatakaza ubushobozi bw’inkingo bwo kurinda Coronavirus kubera ubu bwoko bushya. Zizaba ziri mu byiciro ku bigero byo gukingira, ariko zizaba zikingira Coronavirus, ubwo rero abantu ntibagire ubwoba bw’uko inkingo zizatakaza ubushobozi bwo gukingira".

Yongeyeho ko ikigero cy’ubwirinzi gishobora kuzagabanuka, ati "bisobanuye ko niba virus ifite ubukana bwinshi, uzakenera urukingo rufite ubukana bwinshi, hari uburyo virus iba yakwihagararaho, ikigero cy’ubwirinzi ntikibe 90%, kikaba nka 70%".

Nyuma y’uko ibihugu byinshi bitangiye kugerwamo n’ubwoko bushya bwa Coronavirus, byatumye hari abavuga ko ubu bwoko bushobora no kutazakingirwa n’inkingo ziri gukorwa kuri ubu, bituma ibihugu bitangira gushaka inkingo vuba na bwangu kugira ngo bakingire abaturage babo mbere y’uko ubu bwoko bushya bwa Coronavirus bukwira hose bugatuma inkingo zamaze kugurwa zidakora.

Uruganda rwa Moderna rwatangaje ko inkingo rwakoze zishobora gukingira ubwoko bushya bwa Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .