00:00:00 IGIHE NETWORK KN KINYARWANDA EN ENGLISH FR FRANCAIS

Miliyoni 60 z’inkingo za AstraZeneca Amerika yari ibitse igiye kuziha ibindi bihugu

Yanditswe na Ntabareshya Jean de Dieu
Kuya 27 Mata 2021 saa 12:04
Yasuwe :
0 0

Leta Zunze Ubumwe za Amerika zatangaje ko zigiye gutanga inkingo miliyoni 60 zo mu bwoko bwa AstraZeneca kugira ngo zifashishwe mu bindi bihugu bikiri kugorwa cyane no kubona inkingo.

Urukingo rwa AstraZeneca ruri mu zavugishije abantu benshi hirya no hino ku Isi hashidikanywa ku buziranenge bwarwo bituma bimwe mu bihugu bikomeye byari byaratumije inkingo zo muri ubu bwoko zitihutira kuzitera abaturage babyo.

Amerika ni kimwe mu bihugu byari byaraguze miliyoni nyinshi za AstraZeneca zishyirwa mu bubiko, mu gihe hagitegerejwe ko zemezwa n’inzego zabo zishinzwe ubuzima.

Muri Leta zunze Ubumwe za America ntabwo uru rukingo ruremererwa gukoreshwa, ariko byatangajwe inkingo zizatangwa zizabanza kugenzurwa n’ikigo gishinzwe kugenzura Ibiribwa n’Imiti, FDA, nk’uko umunyamabanga wa Leta ushinzwe itangazamakuru muri white House, Jen Psaki yabitangarije abanyamakuru.

Kugeza ubu nta gihugu kiratangazwa mu bizahabwa izi nkingo ariko ngo doze zigera kuri miliyoni 10 ziteguye gutangwa mu minsi ya vuba mu gihe izindi doze zizatangira gusaranganywa abazikeneye hagati ya Gicurasi na Kamena.

Ibiro by’umukuru w’igihugu bitangaza ko Amerika biyihagije gukoresha inkingo zo mu bwoko bwa Pfizer, Moderna, n’urwakozwe na Johnson &Johnson mu rugamba rwo guhangana na Covid-19.

Psaki yashimangiye ko Amerika idakeneye gukoresha AstraZeneca.

Ati “Ntabwo dukeneye gukoresha AstraZeneca mu rugamba rwacu rwo guhangana na Covid-19 mu mezi make ari imbere.”

Amakuru agaragaraza ko mu gukingira abaturage muri Leta zunze ubumwe za Amerika byibuze abarenga kimwe cya kabiri cy’abantu bakuze bemerewe gukingirwa bahawe doze ya mbere y’urukingo.

Uretse Ibihugu by’amikoro make biri gukoresha inkingo zo mu bwoko bwa AstraZeneca mu gukingira abaturage babyo uru rukingo ruri no kwifashishwa cyane mu burayi mu bikorwa buyo gukingira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .