Michael Moore wamamaye muri filimi yagereranyije Trump na Hitler

Yanditswe na David Eugène Marshall
Kuya 8 Nzeri 2018 saa 10:22
Yasuwe :
0 0

Michael Moore uzwi cyane mu gukora filimi, yagereranyije Perezida Donald Trump, na Adolf Hitler wayoboye u Budage agakorera Abayahudi Jenoside.

Muri filimi mbarankuru Moore yahaye izina rya ‘Fahrenheit11/9’, yerekaniwe i Toronto muri Canada, mu iserukiramuco rya filimi kuwa Kane tariki 06 Nzeri 2018.

Mu buryo iyo filimi itunganijwe, Moore yagereranije imbaraga zakoreshejwe ngo Donald Trump atsinde amatora ya Perezida muri Amerika mu Ugushyingo 2016, n’imbaraga zidasanzwe Adolph Hitler yakoresheje ngo izina rye ryamamare muri Politiki y’u Budage, ahagana mu 1930.

Reuters yanditse ko itashoboye kuvugana na Perezidansi ya Amerika ngo igire icyo itangaza kuri iyi filimi yabaye nko gukora mu jisho Trump.

Muri iyi filimi, Moore agereranyaga amagambo Hitler yajyaga akoresha ari imbere y’imbaga, akayagereranya n’imbwirwaruhame za Trump ndetse akavuga ko nta ho batandukaniye.

Moore avuga ko Trump yahozeho kuva na kera, ariko uko izina rye ryazamutse bigaragaza ukuntu gutegeka kwe ari ikintu cyateguwe kuva kera”.

Moore yongeyeho ko yakoze iyi filimi mu rwego rwo gukangurira Abanyamerika guhagurukira rimwe bakamagana Trump.

Inyito ya filimi “Fahrenheit 11/9” ngo yibutsa itariki ya 9 Ugushingo 2016, ubwo umu-Républicains Donald Trump, yatangazwaga nka Perezida wa Amerika ku mugaragaro, agahigika Hillary Clinton wo mu ishyaka rya aba-Démocrates bari bahanganye.

Iyi filimi kandi ije ikurikirana n’uruherekane rw’ibitekerezo The New York Times iri kugenda itambutsa, bikangurira abanyamerika ‘ukwivumbagatanya kuri Trump gukozwe mu ibanga rikomeye’.

Muri ibyo bitekerezo hanagaragaramo uduce tw’igitabo cy’umunyamakuru Bob Woodward ugaragaza Trump nk’umugabo w’igihubutsi mu byemezo afata.

Filimi ya Michael Moore kandi ntiyasize inyuma ikibazo cy’ubwicanyi bukoresheje imbunda bwa hato na hato bubera mu mashuri.

Ku musozo w’iyi filimi, Moore yagaragaye agaragiwe n’itsinda ry’abanyeshuri bo mu ntara ya Florida, baharanira ko hashyirwaho itegeko ryo kurwanya intwaro mu mashuri. Iyi filimi ikazerekanwa muri Amerika ku itariki ya 21 Nzeri.

Michael Moore uzwi cyane mu gukora filimi yagereranyije Trrump na Hitler


[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza