Loni yasabye Leta Zunze Ubumwe z’Abarabu kugaragaza niba Igikomangoma Latifa akiri muzima

Yanditswe na Ntabareshya Jean de Dieu
Kuya 20 Gashyantare 2021 saa 12:19
Yasuwe :
0 0

Umuryango w’Abibumbye wasabye Leta Zunze Ubumbwe z’Abarabu kugaragaza ibimenyetso bifatika byemeza niba Igikomangoma Latifa, umukobwa w’umuyobozi w’Umujyi wa Dubai akiri muzima nyuma yo kumara igihe atagaragara mu ruhame.

Hatangiye kwibazwa niba Latifa yaba ari muzima nyuma yo gushyira hanze amashusho n’amajwi yifashe muri iki cyumweru avuga ko yafashwe nyuma yo kunanirwa gutoroka igihugu muri 2018.

Umuvugizi w’ishami ry’umuryango w’ababibumbye riharanira uburenganzira bwa muntu, Michelle Bachelet, yagize ati “twifuza kumenya uko bimeze, kubera aya mashusho ari gusakazwa muri iki cyumweru, twasabye amakuru yimbitse n’ubusobanuro by’uko ibintu bimeze ubu. Twasabye ibimenyetso by’uko ari muzima”.

Impungenge ku buzima bwa Sheikha Latifa bint Mohammed al-Maktoum, w’imyaka 35 zagaragaye nyuma y’uko muri iki cyumweru ibitangazamakuru bitandukanye byasohoye amashusho n’amajwi, uyu mukobwa yumvikana avuga ko yayafatiye mu bwiherero bw’aho afungiye mu nyubako iri hafi y’inyanja yahinduwe gereza.

Ambasade ya Leta Zunze Ubumwe z’Abarabu mu Bwongereza ku wa Gatanu yavuze ko ibiri gutangazwa n’itangazamakuru ntaho bihuriye n’ukuri ahubwo ko Latifa ari kwitabwaho mu rugo n’umuryango we n’abaganga kandi ko ari koroherwa, yemeza ko azongera kugaragara mu ruhame mu gihe gikwiye.

Intandaro yo kubura kwa Latifa yatangiye mu mwaka 2018 ubwo yageragezaga gucika igihugu anyuze muri Oman. Yaje gufatirwa ku mupaka w’u Buhinde nyuma y’iminsi umunani, u Buhinde bumugarura muri UAE, ku itegeko rya se Sheikh Mohammed bin Rashid al-Maktoum.

Nubwo inshuti za Latifa zitangaza ko zimaze amezi atandatu batavugana, Sheikh Mohammed avuga ko umukobwa we ari kwitabwaho n’umuryango we.

Uretse uyu mukobwa ariko umugore muto wa Sheikh Mohammed, witwa Princess Haya nawe aherutse guturoka muri Dubai aho yatangaje ko yari afitiye impungenge ubuzima bwe nyuma yo guterwa ubwoba no gutotezwa.

Minisitiri w’intebe w’u Bwongereza, Boris Johnson yavuze ko nawe ahangayikiye ubuzima bwa Latif kimwe na Minisitiri w’ububanye n’amahanga, Dominic Raab, wavuze ko yifuza kubona ibimenyetso ko ari muzima kandi ameze neza.

Guhera mu 2018 Igikomangoma Latifa ntaraboneka mu ruhame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .