U Bufaransa bwaciye ibikombe n’amasahani bikoze muri Plastic

Yanditswe na Kanamugire Emmanuel
Kuya 17 Nzeri 2016 saa 04:18
Yasuwe : XX
0

Leta y’u Bufaransa yasohoye itegeko rikuraho ibikoresho byose bikoze muri Plastic, birimo ibikombe, amasahani n’ibindi byose bikoreshwa ku meza, ahubwo hagakoreshwa ibikoze mu bituruka ku binyabuzima.

Iri tegeko rizatangira gukurikizwa mu mwaka wa 2020,u Bufaransa bukaba buvuga ko bugamije kurengera ibidukikije.

Nubwo abahanga mu bidukikije bemera ko ibyo bikoresho bigira ingaruka ku bidukikije, bavuga ko u Bufaransa bwishe itegeko ry’umuryango w’ibihugu by’Ubumwe bw’u Burayi ryo gukorana ubucuruzi hagati yabyo.

Umuryango utegamiye kuri Leta y’u Bubiligi wiga ku bicuruzwa bikorerwa mu nganda witwa Pack2Go Europe, uvuga ko uzakomeza kurwanya iryo tegeko kugira ngo ritazasakara ku mugabane wose w’u Burayi.

Umunyamabanga mukuru w’uwo muryango Eamonn Bates yabwiye Associated Press ko bagiye gukora uko bashoboye bakarirwanya.

Yagize ati “ Turi gusaba Komisiyo y’Umuryango w’Ubumwe bw’ibihugu by’i Burayi gufatira ibihano u Bufaransa kuko bwishe amategeko agenga umugabane.

Bates avuga ko nta gihamya na kimwe u Bufaransa bufite ko ibyo bikoresho bikoze mu biva mu binyabuzima ari byo byaba bitangiza ibidukikije.

Ingaruka mbi z’ibikoresho bikoze muri Plastic

Abantu batari bake bakunze kubika amafunguro cyangwa ibinyobwa mu bikoresho bikoze muri Plastic nyamara abahanga mu by’ubuzima bagagaraza ko hari ubwoko bwa microbe zibasha kwinjira muri ibyo biryo.Ibikombe, amasahani n’ibindi bikoze muri plastic bifite ibinyabutabire byitwa Bisphenol A mu gihe byinjiye mu mubiri bikaba bishobora kwivanga n’imisemburo ituma habaho uburumbuke ku bagore(estrogen).

Ubushakashatsi bwakozwe n’ikigo gishinzwe kurinda indwara,The U.S.Center for Disease Control (CDC) mu mwaka wa 2004, bwagaragaje ko ibyo binyabutabire bifite uruhare runini mu gutera indwara ya Cancer y’ibere, ndetse ikagabanya n’intanga ku bagabo. Iyi kandi ngo yibasira cyane abana bato n’abagore batwite.

Abantu bagirwa inama yo kudasuka ibiribwa cyangwa ibinyobwa bishyushye cyane mu bikoresho bya plastic kuko bwa bushyuhe butuma hari bimwe mu binyabutabire bigize igikoresho bihita byivanga n’ibiribwa cyangwa ibinyobwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE