Koreya ya Ruguru yikuye mu mikino ya Olempike izabera mu Buyapani

Yanditswe na Mutangana Gaspard
Kuya 6 Mata 2021 saa 03:34
Yasuwe :
0 0

Koreya ya Ruguru yatangaje ko itakigiye guhatana mu mikino Olempike izabera mu Buyapani, mu rwego rwo kwirinda icyorezo cya Covid-19.

Iyi mikino yagombaga kuba mu 2020, ariko iza gusubikwa kubera ikwirakwira ry’icyorezo cya Covid-19 cyari kimaze guhungabanya Isi, bituma yimurirwa muri uyu mwaka aho iteganyijwe ku wa 23 Nyakanga 2021.

Icyemezo cya Koreya ya Ruguru cyo kwikura muri iyi mikino cyafashwe n’Akanama gashinzwe Imikino Olempike muri icyo gihugu mu nama yayobowe na Minisitiri wa Siporo, Kim Il Guk, tariki ya 25 Werurwe uyu mwaka.

Korea ya Ruguru ivuga ko iki cyemezo cyo kwivana muri aya marushanwa, ari uburyo bwo kwirinda ikwirakwira rya Covid-19, kuko ngo nta murwayi n’umwe wa Covid-19 iki gihugu gisigaranye.

Ibi ariko bihakanwa n’abakora mu nzego z’ubuzima ku Isi, kuko bavuga ko kuba Koreya ya Ruguru idashaka kwitabira imikino ya Olempike, atari ikimenyetso cy’uko nta Covid-19 ifite, ahubwo ko byaba byerekana ko icyo gihugu cyibasiriwe n’icyorezo.

Minisitiri ufite imikino ya Olempike mu nshingano ze mu Buyapani, Matayo Marukawa, yavuze ko nta byinshi yavuga kuri iki cyemezo.

Koreya ya Ruguru ititabiriye aya marushanwa, yaba ari inshuro ya kabiri yivanye mu marushanwa y’imikino Olempike, kuko bwa mbere yabikoze mu 1988 ubwo yaberaga muri Korea y’Epfo, igihugu byari bifitanye amahari.

Byari biteganyijwe ko mu mikino ya Olempike, Koreya ya Ruguru izagirana ibiganiro n’ibihugu bitandukanye nka Leta Zunze Ubumwe za Amerika, u Buyapani na Koreya y’Epfo mu rwego rwo kuganira ku kibazo cy’umwuka utari mwiza umaze igihe kinini mu mubano wabyo.

Koreya ya Ruguru ntizitabira imikino ya Olempike izabera mu Buyapani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .