Kayonza: Imiryango 73 itishoboye yorojwe inka zihaka

Yanditswe na Hakizimana Jean Paul
Kuya 6 Ukwakira 2018 saa 01:13
Yasuwe :
0 0

Abaturage bari mu cyiciro cya mbere ni cya kabiri cy’Ubudehe bo mu mirenge ya Ndego na Kabarondo, borojwe inka zihaka guhera ku mezi atatu kuzamura, hagamijwe kubafasha kwiteze imbere no kurwanya imirire mibi.

Kuri uyu wa Gatanu nibwo imiryango 73 yorojwe inka ku bufatanye bw’Akarere n’Umushinga ushamikiye ku Kigo cy’Igihugu Gishinzwe Ubuhinzi n’Ubworozi, RAB, ushinzwe guteza imbere ubworozi bw’inka.

Yamfashije Olive wo mu Murenge wa Kabarondo wahawe inka ihaka, yabwiye IGIHE ko agiye guca ukubiri n’indwara zishamikiye ku mirire mibi.

Ati "Ubu hehe na bwaki mu rugo rwanjye kuko iyi nka igiye kumpa ifumbire, impe amata, murumva ko iterambere ryageze iwanjye. Ndi kwibaza nti nari buzahingire abantu imyaka ingahe kugira ngo mbone inka?”

Buhirike Pierre w’imyaka 58 utuye mu murenge wa Ndego, we yavuze ko ari iby’agaciro kuba agiye gusaza anywa amata.

Yakomeje agira ati "Ubusanzwe amata nayanywaga ari uko umuturanyi ayampaye, ariko kuri ubu nishimiye ko ngiye kubona ifumbire n’umuryango wanjye ukanywa amata."

Buhirike yakomeje ashimira Umukuru w’Igihugu kuko ngo ibyiza byose bigerwaho kubera amahoro n’umutekano.

Umuyobozi w’Akarere ka Kayonza Murenzi Jean Claude yasabye abaturage borojwe gufata neza inka bahawe zikababera umusingi w’iterambere, bakazigaburira ubwatsi bukwiye kugira ngo zitange umukamo uhagije.

Yanabibukije ko bakwiye kuzoroza bagenzi babo.

Biteganyijwe ko imiryango izorozwa muri iki cyiciro ari 81, abasigaye bakazabona inka zabo nyuma.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza