Julian Assange washinze WikiLeaks ari mu mazi abira

Yanditswe na Iradukunda Desire
Kuya 26 Gicurasi 2018 saa 12:35
Yasuwe :
0 0

Umunya- Australia ufite ubwenegihugu bwa Equateur, Julian Assange, washinze urubuga rwamamaye mu gushyira ahagaragara amabanga y’abantu bakomeye n’ibihugu; ari mu rungabangabo bitewe n’uko ashobora kwamburwa ubuhunzi yahawe.

Hashize imyaka igera kuri itandatu uyu mugabo washinze Wikileaks ari mu buhunzi muri Ambasade ya Equateur iri i Londres mu Bwongereza kubera ibyaha bitandukanye akurikiranyweho birimo gufata ku ngufu no kumena amabanga.

Biravugwa ko mu gihe yaba asohotse muri iyi ambasade, u Bwongereza bwahita bumuta muri yombi ku buryo yakoherezwa muri Zunze Ubumwe za Amerika agakurikiranwa n’ubutabera.

CCN yatangaje ko Assange wakunze kumvikana avuga ko ubuzima abayemo muri Ambasade ya Equateur butameze neza, ngo isaha iyo ariyo yose ashobora kuyimukamo.

Hari abantu ba hafi ya Assange batangaje ko uyu mugabo ‘atamerewe neza’ ndetse ashobora kuva muri iyi ambasade ‘umunsi uwo ari wo wose’ cyangwa se agasohorwamo ku ngufu bitaba ibyo imibereho igoranye akaba ariyo izatuma ayivamo ku giti cye. Aha niho bahera bavuga ko asa n’uri mu manga.

Umwunganizi mu nkiko wa Assange, Melinda Taylor, abinyujije kuri Twitter yatangaje ko hari impungenge z’uko Assange nava muri Ambassade azahita atabwa muri yombi.

Ati ”Igihari kuva ku munsi wa mbere ni uko Assange naramuka asohotse muri Ambasade azajya kubazwa ibyo Umuyobozi Mukuru w’ihuriro riharanira uburenganzira bw’abasivile muri Amerika (ACLU) yise ibirego, bidakurikije amategeko, bitanemewe n’Itegeko Nshinga, ku butasi bwa Amerika.”

Muri Mata 2017, Leta Zunze Ubumwe za Amerika zateguye ibirego bita muri yombi Assange. Inzego z’Ubutasi z’iki gihugu zavugaga ko yaba yarifashishijwe n’Abarusiya mu kumena amabanga yari akubiye mu butumwa bwa ‘emails’ bwa Hillary Clinton mu bihe byo kwiyamamaza mu matora ya 2016 yegukanwe na Donald Trump.

Umunyamategeko wa Assange yavuze kandi ko we n’umukiliya we bafunzwe iminsi 2720, muri iyo 53 bari bafungiwe ahantu ha bonyine, nta n’umuntu wemerewe kubasura ndetse ko nta gihamya ko Assange yaba yaragize uruhare mu guha Abarusiya amabanga ya Clinton.

Muri Mutarama uyu mwaka, Leta ya Equateur yahaye ubwenegihugu Assange nyuma y’imyaka itanu yari amaze aba muri Ambasade y’icyo gihugu i Londres.

Ni mu gihe mu 2012 aribwo yagannye muri iyi ambasade ahunga koherezwa muri Suède mu iperereza ku byaha byo gufata ku ngufu nubwo we abihakana.

Suède yaje gukuraho ibyo birego ariko Assange aguma muri iyo Ambasade kuko u Bwongereza bukimushakisha, cyane ko yahunze akimara kurekurwa by’agateganyo hatanzwe ingwate, mu gihe haburanwaga niba yakoherezwa aho bikekwa ko yakoreye icyaha.

Usibye amabanga yerekeye Hillary Clinton bivugwa ko yahaye u Burusiya, Leta Zunze ubumwe za Amerika zirashaka kuzamubaza ku yandi y’igisirikare n’ay’igihugu yashyizwe hanze na WikiLeaks mu 2010.

Hashize imyaka igera kuri itandatu uyu mugabo washinze Wikileaks ari mu buhunzi muri Ambasade ya Equateur iri i Londres mu Bwongereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza