00:00:00 IGIHE NETWORK KN KINYARWANDA EN ENGLISH FR FRANCAIS

Ishyaka rya Angela Merkel ryatsinzwe amatora mu Budage

Yanditswe na Ndahayo Emmanuel
Kuya 27 Nzeri 2021 saa 10:49
Yasuwe :
0 0

Ishyaka rya Angela Merkel wari umaze imyaka 16 ari Chancelière w’u Budage, ryatsinzwe amatora yo ku rwego rw’igihugu yegukanwe n’ishyaka rya SPD riyoborwa na Olaf Scholz wari wungirije Angela Merkel, ndetse akanaba Minisitiri w’Imari.

SPD yagize amajwi 25,7%, yatsinze mu buryo bugoranye impuzamashyaka igizwe n’amashyaka ya CDU na CSU (CDU-CSU), yagizwe amajwi 24,1%. Iyi mpuzamashyaka yari iyobowe na Armin Laschet wasimbuye Angela Merkel.

Ishyaka riharanira guteza imbere ibidukikije, Greens, riyobowe na Annalena Baerbock, ryaje ku mwanya wa gatatu, rigira amajwi 14,8%, inyongera ikomeye kuko mu matora aheruka mu 2017, iri shyaka, rigizwe n’abakiri bato, ryari ryagize amajwi 10%.

Inteko Ishinga Amategeko y’u Budage, Bundestag, niyo izemeza umuyobozi uzasimbura Angela Merkel, aho byitezwe ko Scholz azahabwa izo nshingano.

Hagati aho, bitewe n’uko nta shyaka ryatsinze ku bwiganze buhagije, hagiye gushyirwaho Leta y’inzibacyuho izaba ihuriweho n’amashyaka atatu ashobora no kurenga, yagize amajwi menshi muri aya matora. Byitezwe ko ishyaka rya SPD rigiye guhabwa amahirwe yo gushyiraho Leta ihuriwe, rikagomba kuyakoresha neza kugira ngo atazahabwa abahanganye n’iri shyaka mu gihe ryananirwa izo nshingano.

Mu gihe iyi Leta itarajyaho, Merkel azakomeza kuyobora inzibacyuho kugera igihe iyi Leta izemezwa, igatangira imirimo. Abakurikirana ibya politiki y’u Budage bemeza ko ishyirwaho ry’iyi Leta rishobora kuzatwara igihe kinini, na cyane ko ishyirwaho rya Leta y’ubushize, mu matora ya 2017, ryatwaye hafi amezi atanu, nubwo Angela Merkel yari akiri Chancelière w’icyo gihugu.

Ibibazo bitegereje Leta nshya y’u Budage

U Budage ni igihugu cyihagazeho ku Mugabane w’u Burayi kuko ari cyo gifite ubukungu bukomeye kurusha ibindi, gikesha cyane ibyohereza mu mahanga bigize hafi kimwe cya kabiri cy’umusaruro mbumbe w’igihugu, na byo bikagirwa n’ibirimo imodoka n’imashini zikoreshwa mu bintu bitandukanye.

Icyakora iki gihugu gifite ibibazo bitandukanye bishobora gukoma mu nkokora iterambere ryacyo, birimo kuba kiri gusigara inyuma mu ikoranabuhanga ry’ibikoresho bitandukanye, ingaruka z’ihindagurika ry’ikirere, ihangana ku masoko mpuzamahanga n’ibihugu birimo u Bushinwa, ndetse n’ubwiyongere bw’abaturage bageze mu zabukuru, kuko impuzandengo y’abaturage b’iki gihugu ari imyaka 45.

Mu iperereza ryakozwe mbere gato y’amatora, na nyuma gato y’imyuzure yahitanye abantu barenga 130 muri icyo gihugu, ryagaragaje ko abaturage cyane cyane abakiri bato, barajwe ishinga cyane n’ikibazo cy’ihindagurika ry’ikirere, ku buryo hari urubyiruko rwishoye mu mihanda rusaba Leta kugira icyo ikora kuri iki kibazo, ndetse bamwe biyicisha inzara hafi yo kwitaba Imana.

Mu mashyaka yose yiyamamaje, nta na rimwe ritagaragaje intego rifite zo kugabanya umwuka wangizwa ikirere uturuka mu nganda zikora ibikoresho bitandukanye muri icyo gihugu.

Icyakora impuguke mu bukungu zemeza ko guhindura imiterere y’inganda bizatwara igihe kinini, kandi bikazagira ingaruka zikomeye ku bukungu kuko urwego rw’inganda rugize 18% by’umusaruro mbumbe w’u Budage.

Impamvu ni uko bizasaba ishoramari rinini cyane kugira ngo inganda zikora imikoresho birimo imodoka, zitangire gukora imodoka zikoresha amashanyarazi n’ubundi buryo butangiza ibidukikije, ibi bikazasubizwa inyuma n’uko inganda zo mu Budage zirimo Volkswagen, ari bwo zigitangira kwinjira muri ibi bikorwa, mu gihe inganda zo muri Amerika n’u Bushinwa zikataje muri iri terambere.

Bivugwa ko Merkel yirinze gushyira igitutu ku nganda zo muri icyo gihugu azisaba gukoresha uburyo butangiza ikirere, bitewe n’uko yatinyanga ingaruka byagira ku bukungu bw’u Budage, busanzwe buzamuka ku gipimo cyo hasi kuko mu 2019 mbere ya Covid-19, bwazamutse ku kigero kiri munsi ya 0,6%.

Icyakora bitewe n’ubushake bw’abaturage, izi nganda nta yandi mahitamo zifite uretse kuyoboka iyi nzira yo kuvugurura ikoranabuhanga ryazo, rikajyanishwa no kutangiza ibidukikije.

Indi ngingo izakora Leta nshya ni ukumenya uburyo u Budage buzitwara mu ntambara ikomeje gututumba hagati y’u Bushinwa na Leta Zunze Ubumwe za Amerika.

U Budage busanzwe bufitanye umubano w’akadasohoka na Amerika, ariko kuva mu 2016, u Bushinwa bwayoboye ibindi bihugu mu gukorana ubucuruzi bukomeye n’u Budage, ari naryo soko rya mbere ry’imodoka z’iki gihugu.

Mu gihe umubano wa Amerika n’u Bushinwa watangira kuzamo agatotsi, Merkel yakomeje kugerageza kwirinda kugira uruhande abogamiraho, ariko ibi bishobora guhinduka nyuma y’uko bigaragara ko Amerika ikomeje gushyira imbaraga mu guhangana n’u Bushinwa, ndetse igasaba ibindi bihugu kuyishyigikira. Mu gihe ibi byakomeza, Leta nshya izagorwa no kwiteranya n’u Bushinwa bugize igice kinini cy’ibyo u Budage bwohereza hanze, ndetse na Amerika ifitanye umubano mwiza n’icyo gihugu mu myaka myinshi ishize.

Ibindi bibazo by’ingutu birimo gufasha ubukungu bw’iki gihugu kwivana mu ihungabana bwatewe na Covid-19, aho bwamanutse ku kigero cya 4,9% mu mwaka ushize, gukomeza kugira uruhare mu Muryango w’Ubumwe bw’u Burayi ujegajega, kwimakaza umubano n’ibihugu birimo ibyo muri Afurika, kugira uruhare mu kibazo cy’abimukira barimo abaturaka muri Afghanistan, gufasha ibihugu bikennye kubona inkingo za Covid-19 n’ibindi bitandukanye.

SPD riyoborwa na Olaf Scholz wabaye Vice-Chancellor w’u Budage akorana na Merkel, ndetse akanaba Minisitiri w’Imari, ryaje ku mwanya wa mbere n'amajwi 25,7%
Armin Laschet wasimbuye Angela Merkel. akaba Umuyobozi w'Impuzamashyaka ya CDU-CSU, yaje ku mwanya wa kabiri n'amajwi 24,1%
Ishyaka rya Greens riyobowe na Annalena Baerbock ryaje ku mwanya wa gatatu n'amajwi 14,8%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .