00:00:00 IGIHE NETWORK KN KINYARWANDA EN ENGLISH FR FRANCAIS

Isaac Herzog yatorewe kuba Perezida wa Israel

Yanditswe na Kanamugire Emmanuel
Kuya 2 Kamena 2021 saa 05:45
Yasuwe :
0 0

Umuhungu w’uwabaye Perezida wa gatandatu wa Israel, Isaac Herzog agiye gusimbura Umukuru w’igihugu ucyuye igihe, Reuven Rivlin nyuma yo kwegukana intsinzi mu matora kuri uyu wa Gatatu.

Isaac Herzog abaye Perezida wa 11 wa Israel nyuma yo gutsinda amatora ahigitse Miriam Peretz bari bahanganye. Abadepite 87 batoye Herzog mu gihe 27 ari bo batoye Peretz.

Azasimbura Reuven Rivlin mu kwezi gutaha muri manda y’imyaka irindwi izatangira ku ya 9 Nyakanga 2021.

Nyuma yo gutsinda amatora Herzog yagize ati “Niteguye kuba Perezida wa buri wese. Nzumva buri rwego na buri muntu.”

Yakomeje ashimangira ko azubaka ikiraro gihuza abaturage bari imbere mu gihugu n’abatuye mu mahanga. Agaruka ku bibazo bimutegereje, yavuze ko ari byinshi kandi nta gikwiye gushyirwa ku ruhande.

“Ni ingenzi kuvura ibikomere biri muri sosiyete yacu. Tugomba kurengera isura ya Israel mu ruhando mpuzamahanga, kurwanya ibitero bikorerwa abayahudi n’urwango ku Banya-Israel no kurinda inkingi za demokarasi yacu.”

Minisitiri w’Intebe, Benjamin Netanyahu yacyeje Isaac Herzog kubera intsinzi yegukanye nka Perezida mushya wa Israel.

Yagize ati “Ndamwifuriza intsinzi ikomeye mu izina ry’abanya-Israel bose. Ndashimira Miriam Peretz ku bwa kandidatire ye kandi ndahamya ko azakomeza gutanga umusanzu we mu kubaka Israel nk’uko yabikoze mu buzima bwe bwose.”

Herzog ni uwo mu muryango w’abakunze kuvamo abategetsi bo ku rwego rwo hejuru muri Israel. Ni umuhungu wa Chaim Herzog wavukiye muri Irland akaba yarabaye Perezida wa gatandatu wa Israel, wayoboye manda ebyiri z’imyaka 10, kuva 1983 kugeza 1993. Mu nshingano yabayemo mbere harimo ko Herzog yahagarariye Israel muri Loni imyaka itatu.

Isaac Herzog, niwe wegukanye intsinzi mu matora ya Perezida wa Israel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .