00:00:00 IGIHE NETWORK KN KINYARWANDA EN ENGLISH FR FRANCAIS

Inkongi y’umuriro udasanzwe ikomeje guca ibintu muri Amerika, Bill Gates yicujije itandukana rye na Melinda: Agezweho mu mahanga

Yanditswe na IGIHE
Kuya 6 Kanama 2021 saa 11:40
Yasuwe :
0 0

Leta 13 muri Leta Zunze Ubumwe za Amerika, zihanganye n’ikibazo cy’inkongi z’umuriro udasanzwe, zimaze kwangiza ibikorwaremezo biri ku buso burenga kirometero kare ibihumbi 7.5.

Uyu muriro wakajije umurego muri Leta ya California, aho umaze ibyumweru bitatu waka ubutazima, ndetse ukaba ukomeje kugenda wototera imijyi mito iri hafi y’amashyamba, ku buryo inzu, imodoka, hotel, amashuri, inzu ndangamurage n’ibindi byinshi bibarurwa mu byamaze gutwikwa n’uyu muriro udasanzwe.

Abantu barenga ibihumbi 26 bari kurwana no kuzimya inkongi z’umuriro zirenga 97, ariko bitewe n’ikibazo cy’umuyaga mwinshi ndetse n’ubushyuhe bukabije, ntabwo barabafasha kuzimya izi nkongi.

Nibura abantu ibihumbi 26 batuye mu mijyi iri hafi y’amashyamba ari gushya, basabwe kuva mu ngo zabo bagahunga, mu gihe byitezwe ko abandi bantu ibihumbi 20 na bo bashobora gusabwa guhunga igihe icyo ari cyo cyose.

Izi nkongi z’umuriro ziterwa n’ubushyuhe bukabije butangira butwika amababi n’ubwatsi bwumye cyane mu mashyamba, noneho ukagenda ukwirakwizwa n’umuyaga ushobora kugendera kuri kirometero 64 ku isaha (64kmh).

Buri mpeshyi, inkongi z’umuriro ziravuka mu mashyamba ya California n’ibindi bice bya Amerika, icyakora mu myaka 30 ishize iki kibazo cyariyongereye, abahanga bakavuga ko gifitanye isano n’iyangirika ry’ikirere, ryatumye Isi igira ubushyuhe budasanzwe ari na bwo ntandaro y’izi nkongi z’umuriro.

Uretse Amerika, ibihugu birimo Turukiya na byo bihanganye n’izi nkongi, ndetse mu gihe ubushyuhe bwo ku Isi bwakomeza gukaza umurego ku kigero buriho uyu munsi, nta kabuza ko inkongi nk’izi zakomeza kwagukira no mu bindi bice by’Isi.

Inkongi z'umuriro zikabije zikomeje kototera ibice bituwemo n'abaturage muri Leta ya California muri Amerika

==================================================

Ethiopia: Inyeshyamba za Tigray zafashe umujyi ndangamurage wa UNESCO

Inyeshyamba zo mu gace ka Tigray, zimaze umwaka zihanganye n’ingabo za Leta ya Ethiopia, zafashe umujyi muto witwa Lalibela, ufite amateka akomeye kuko wubatsemo insengero zifite imiterere yihariye yo mu kinyajana cya 12 na 13.

Mu 1979, uyu mujyi washinzwe mu mijyi ndangamurage y’Ishami ry’Umuryango w’Abibumbye rishinzwe Ubumenyi, Uburezi n’Umuco (UNESCO), bitewe n’insengero zubatswe munsi y’ubutaka, kuri ubu zigikurura ba mukerarugendo benshi.

Igituma ifatwa ry’uyu mujyi rifatwa nk’ikintu gikomeye muri iyi ntambara, ni uko utari muri Ntara ya Tigray, ahubwo uri muri Ntara ya Amhara, na yo isanzwe ifite ingabo zitumvikana n’izo muri Tigray, ndetse ikaba iri no ku ruhande rwa Leta ya Ethiopia mu ntambara irimo n’inyeshyamba za Tigray.

Abakurikirana iby’iyi ntambara bemeza ko ibintu bishobora guhinduka bigatuma inyeshyamba za Amhara na zo zisuganya zikinjira muri iyi ntambara byeruye, ibishobora gutuma irushaho guhindura isura ndetse ikaba yaganisha ku bikorwa bya Jenoside, kuko uduce twombi dutuwe n’abaturage bo mu moko atandukanye kandi mu myaka yashize bakaba barakunze gukozanyaho.

Hagati aho, mu gihe ingabo za Leta ya Ethiopia zari ziherutse kuva muri Leta ya Tigray, amakuru avuga ziri kwisuganya ngo zigabe ibitero simusiga bishobora gutsimbura izo nyeshyamba burundu, umugambi uri gutegurwa ku bufatanye n‘ingabo za Amhara ndetse n’izo mu bindi bice bitumvikana n’ingabo za Tigray.

Bikekwa ko mu gihe ingabo za Ethiopia zatsindwa uru rugamba, ingabo za Tigray zishobora gutangaza ubwigenge bw’iyo Ntara ituwe na miliyoni esheshatu z’abaturage, yakunze gushinja Leta ya Ethiopia kutayitaho ari na byo bituma iri mu bukene bukabije.

Ingabo za Tigray zafashe umujyi ukomeye cyane wo mu Ntara ya Amhara, urimo inzu ndangamurage za UNESCO

=================================================

Bill Gates yicujije itandukana rye na Melinda Gates

Bill Gates, umukire w’imyaka 65 akagira umutungo ukabakaba miliyari 131$, yatangaje ko itandukana rya Melinda Gates wahoze ari umufasha we ‘ryari igikorwa cy’agahinda mu buzima bwe’ nyuma y’uko urukiko rwemeje ko aba bombi batandukana burundu, aho bari bamaze imyaka ibiri batarebana akana ko mu jisho.

Bill na Melinda bari bamaze imyaka 20 babana aho bari bafitanye abana batatu, ndetse bakaba bari bafite umuryango wita ku bikorwa byo guteza imbere ubuzima ku Isi, uzwi nka ‘Bill & Melinda Gates’ wari umaze gushobora miliyari 50$ mu myaka 20 ishize.

Agatotsi mu mubano w’aba bombi katangiye ubwo amakuru yajyaga hanze ko Bill Gates yaciye inyuma umugore mu myaka 20 ishize, aho yaryamanye igihe kirekire n’umwe mu bakozi bamaze igihe kirekire bakorera Microsoft, ikigo cyatangijwe na Bill Gates ari na cyo akesha umutungo we.

Uyu mugabo kandi yavuze ko yicuza umubano yagiranye na Jeffrey Epstein wahamijwe ibyaha byo gucuruza no gusambanya abana, akaza kwiyahura mu 2019 ubwo yari muri gereza. Bill Gates yavuze ko umubano wabo watangiye kuva mu 2011, wari ugamije kurebera hamwe uburyo aba bagabo bombi bakorana mu rwego rwo gushakira umuryango wa Bill & Melinda Gates amafaranga yo gukomeza gushora mu bikorwa by’ubuzima ku rwego rw’Isi.

Hagati aho, Melinda Gates yavuze ko mu gihe cy’imyaka ibiri, azakomeza inshingano yari asanzwe afite muri muryango wabo, bitagenda neza akazawuvamo burundu akajya mu bikorwa bye ku ruhande.

Bill Gates yavuze ko yababajwe cyane no gutandukana na Melinda Gates bari bamaze imyaka 27 babana

=================================================

Israel yarashe ibisasu muri Lebanon

Leta ya Israel yatangaje ko yarashe ibisasu mu Majyepfo ya Lebanon nyuma y’uko na yo irashwe n’ibisasu biturutse muri icyo gihugu.

Amajyepfo ya Lebanon ni indiri y’umutwe ya Hezbollah uterwa inkunga na Iran, ndetse uyu mutwe ukaba warakunze kurwana n’ingabo za Israel, aho imirwano ikomeye yaherukaga yabaye mu 2006.

Minisitiri w’Ingabo muri Israel, Benny Gantz, yavuze ko “Igitero cyagabwe cyari kigamije gutanga ubutumwa…Mu by’ukuri dushobora gukora ibirenze ibi, ariko turizera ko bitazaba ngombwa.”

Minisitiri w’Intebe wa Lebanon, Michel Aoun, yavuze ko igikorwa cyakozwe na Leta ya Israel ari ubushotoranyi kandi kitajyanye n’amahame mpuzamahanga yo kubaha ubusugire bw’igihugu.

Indege za Israel zarashe muri Lebanon

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .