00:00:00 IGIHE NETWORK KN KINYARWANDA EN ENGLISH FR FRANCAIS

Gutahura inkomoko ya Covid-19 bikomeje kugorana

Yanditswe na Bukuru JC
Kuya 30 Ukwakira 2021 saa 01:56
Yasuwe :
0 0

Inkomoko y’icyorezo cya Covid-19 ishobora kutazamenyekana burundu, nyuma y’uko itsinda ry’abakora mu nzego z’ubutasi za Amerika zari zarashinzwe gukora ubushakashatsi ku nkomoko y’iyi ndwara ritemeranyije ku gisubizo kimwe.

Ahagana mu mpera y’umwaka wa 2019, mu Bushinwa hadutse Covid-19, Leta y’icyo gihugu itangaza ko yavuye kuri virus ya Sars-Cov-2 yo mu muryango wa virus za Coronavirus, iyo virus ikaba yarageze mu bantu iturutse ku nyamaswa, uducurama dusanzwe ducumbikiye izo virus dushinjwa kuba nyirabayazana wayo ku Isi.

Leta yatangaje ko isoko ryacururizwaho ibiribwa birimo n’ibikomoka ku nyamaswa riri mu Mujyi wa Wuhan, ari ho hagaragaye iki cyorezo bwa mbere.

Ibi kandi byanaje kwemezwa n’itsinda ry’Umuryango w’Abibumbye ryita ku Buzima, OMS, ryakoreye ubushakashatsi mu Bushinwa rikemeza ko hari amahirwe menshi y’uko iyi virus yaturutse ku nyamaswa yinjira mu bantu.

Ibi ariko byakomeje kwamaganwa n’abashakashatsi biganjemo abakorera muri Amerika, bavuze ko iyi virus ifite ibimenyetso by’uko yakorewe muri laboratwari, ikagera mu bantu mu buryo bushobora kuba ari impanuka.

Umujyi wa Wuhan wagaragayemo iyi virus ku nshuro ya mbere, ucumbikiye laboratwari ikora ubushakashatsi ku virus zirimo Coronavirus, aho ikora ubushakashatsi abahanga bemeza ko buteye impungenge cyane, bw’aho hafatwa virus ikongererwa ubushobozi yari ifite, kugira ngo hasuzumwe uburyo yakwitwara, bityo mu gihe yazaramuka yinjiye mu bantu, hazaba hari amakuru ahagije ashobora kwifashishwa mu kuyirwanya, yaba mu buryo bwo kuyikorera inkingo n’imiti biyirandura.

Iyi laboratwari iri ku rwego mpuzamahanga, ni yo ya mbere ikomeye ku Isi mu gukora ubushakashatsi kuri Coronavirus, ikaba yaruvatswe ku bufatanye n’u Bufaransa, bwanabanje kujya bufasha u Bushinwa mu bijyanye n’ikorabuhanga ryayo mu minsi ya mbere.

Gusa ibintu byaje guhinduka mu 2014, ubwo Leta y’u Bushinwa yatangiraga kwirukana Abafaransa, amakuru akavuga ko kuva icyo gihe, iyo laborwatwari yigaruriwe n’igisirikare cy’u Bushinwa, mu rwego rwo gukora intwaro zishingiye ku binyabuzima (biological weapons).

Izi ntwaro zikunze kuba zigizwe n’indwara zishobora kuba zaterwa mu bantu runaka, zikaba zitunzwe n’ibihugu bikomeye mu bya gisirikare, bityo n’u Bushinwa bukaba bwarashinjwe kugira inyota yo kugera kuri ibyo bikorwa.

Ikindi gitangaje muri ibi byose ni uko iyi laboratoire, nubwo yakoraga ubushakashatsi bufite ibyago bikomeye ku kiremwamuntu (bwo kongerera virus ubukana), yaterwaga inkunga na Amerika, amakuru akavuga ko iki gihugu cyabikoraga kuko kitifuzaga gutunga laboratwari nk’izo ku butaka bwacyo, bityo bikaba byiza kubikorera mu kindi gihugu.

Abavuga ko iyi laboratwari ari yo yabaye intandaro y’iki cyorezo, bashingira ku makuru ataremejwe na Leta y’u Bushinwa, yavugaga ko abantu ba mbere bagaragaje ibimenyetso bya Covid-19, ari abashakashatsi bakoraga muri iyi laboratwari, bikavuga ko umwe mu bayikoramo yasohokanye n’umukunzi we yamaze kuyandura akayimwanduza, ubwo virus igatangira gukwirakwira gutyo.

Ibindi bimenyetso bashingiraho ni uko mbere gato y’uko Covid-19 yaduka, iyi laboratwari yasibye amakuru yose yari yarashyize ku rubuga rwayo ajyanye n’ubushakashatsi yari yarakoze, ndetse inamara igihe kinini idakorana n’ikoranabuhanga riturutse hanze yayo.

Ibi bimenyetso byose ni byo byatumye Perezida Biden ategeka inzego z’ubutasi mu gihugu cye gukora icukumbura ku ntandaro ya nyayo ya Covid-19, iri tsinda ariha iminsi 90.

Amakuru yagiye hanze yerekana ko abagize iryo tsinda batumvikanye ku ntandaro y’iki cyorezo, aho bamwe bemeza ko cyakomotse ku nyamaswa kikinjira mu muntu, mu gihe abandi bemeza ko cyakorewe muri laboratwari.

Inzego enye mu zakoze ubu bushakashatsi zavuze ko ‘icyizere cy’uko iyi virus yakorewe muri laboratwari kiri hasi’ mu gihe urundi rwego rwemeje ko icyo cyizere ‘kiringaniye’, gusa ibyo bipimo byombi bikaba bidahagije kugira ngo hemezwe inkomoko ntakuka y’iki cyorezo.

U Bushinwa bwakomeje gushinjwa kudatanga amakuru ahagije ku nkomoko y’iki cyorezo, bwakomeje kwigarama amakuru y’uko cyakomotse muri laboratwari, bukavuga ko cyakomotse mu isoko ry’inyamaswa i Wuhan.

Kugera ubu, abantu bakabakaba miliyoni eshanu bamaze guhitanwa n’iki cyorezo ku rwego rw’Isi, na ho abarenga miliyoni 240 bamaze kucyandura, nubwo hari ibipimo byerekana ko iyo mibare ishobora kuba ari kimwe cya gatatu cy’abarwaye n’abahitanywe n’iki cyorezo.

Laboratwari y'i Wuhan yakomeje gushinjwa kuba inkomoko ya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .