Indonesia: Abahitanywe n’umutingito bamaze kurenga 1200

Yanditswe na Evariste Nsengimana
Kuya 2 Ukwakira 2018 saa 12:01
Yasuwe :
0 0

Ikigo gishinzwe gukumira ibiza muri Indonesia cyatangaje ko kugeza ubu hamaze kuboneka imirambo y’abantu basaga 1200, bishwe n’umutingito na tsunami.

Ku wa Gatanu w’icyumweru gishize nibwo muri iki gihugu habaye umutingiro wari ku gipimo cya 7.5, wibasira umujyi wa Palu uri ku kirwa cya Sulawesi.

Ku wa Gatandatu, imirambo yari imaze kuboneka yari 844 ariko ubutabazi no gushakisha indi byari bigikomeje.

Buri wese arajwe ishinga no kurokora abo mu miryango ye, mu gihe imirimo itandukanye yo isa n’iyahagaze kubera ibura ry’amazi, amashanyarazi n’ibindi bikorwa remezo nk’uko BBC yabitangaje.

Umwe mu bapolisi yavuze ko bahawe inshingano zo kurinda amaduka ko asahurwa ariko ko byananiranye, abaturage bari kuyirwanya bashaka kuyasahura.

Abaturage bavuga ko ibihe bibakomereye kuko batabasha kubona ubutabazi, ibiribwa, ubuvuzi n’ubundi bufasha.

Umuryango mpuzamahanga utabara imbabare, Croix Rouge, watangaje ko hari imirambo 34 y’abanyeshuri yasanzwe yaguweho n’urusengero. Iri mu itsinda ry’abasaga 86 bari baburiwe irengero bari mu masengesho.

Umuvugizi wa Croix Rouge muri Indonesia, Ridwan Sobri, yavuze ko icyondo gihari giteye ubwoba, kibabuza gutabara.

Ikindi kibazo gikomereye abaturage ni ihungabana.

Visi Perezida wa Indonesia, Jusuf Kalla, yavuze ko umubare w’abishwe n’ibi biza uzaba ubarirwa mu bihumbi, naho Croix Rouge itangaza ko abo bizagiraho ingaruka barenga miliyoni 1.6.

Indonesia ikunze kwibasirwa n’imitingito iherekezwa na tsunami. Uwahitanye benshi ni uwabaye mu Ukuboza 2004, bageze ku bihumbi 220.

Ibintu byinshi muri Indonesia byangijwe n'umutingito na Tsunami

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza