00:00:00 IGIHE NETWORK KN KINYARWANDA EN ENGLISH FR FRANCAIS

Impungenge ku myanzuro izaturuka mu nama ya COP26 yimuriwe igihe yagombaga gusorezwa

Yanditswe na Ndahayo Emmanuel
Kuya 13 Ugushyingo 2021 saa 12:27
Yasuwe :
0 0

Mu ijoro ryo kuri uyu wa Gatanu tariki ya 12 uku kwezi, byari byitezwe ko Inama Mpuzamahanga y’Umuryango w’Abibumbye iri kuganira ku ihindagurika ry’ikirere, COP26, yari burangire nyuma y’ibyumweru bibiri iri kubera i Glasgow muri Ecosse.

Icyakora siko byagenze, kuko ingingo zikomeye zitabashije kumvikanwaho n’abahagarariye ibihugu bigera kuri 200 byitabiriye iyi nama, ibyanatumye igihe yari yaragenewe cyongerwa kugira ngo izo ngingo zose zemeranyweho.

Zimwe mu ngingo zakomeje gukurura impaka harimo ijyanye n’ikoreshwa rya nyiramugengeri, aho abahanga mu by’ihindagurika ry’ikirere bemeza ko izi ngufu zigomba guhagarikwa gukoreshwa mu gihe cya vuba, kugira ngo Isi yizere kugera ku ntego yo kugumisha ubushyuhe kuri dogere Celcius ziri munsi ya 1,5C.

Mu 2015, inama nk’iyi yari yabereye i Paris mu Bufaransa, yari yemeje ko gukoresha izo ngufu bigomba guhinduka, ariko ntiyashyiraho igihe n’amabwiriza yo kwihutisha izo mpinduka.

Icyakora bitewe n’uburyo ubushakashatsi ku ihindagurika ry’ikirere bugenda bwaguka buri munsi, abahanga baherutse kuvuga ko izo ngufu zikwiriye gusimbuzwa vuba na bwangu, nka bumwe mu buryo buzatuma Isi yizera kugera ku ntego yihaye zo kugumisha ubushyuhe munsi ya dogere Celcius 1,5C.

Icyakora izi mpinduka zihuse ntabwo zakiriwe neza n’ibihugu birimo u Buhinde n’u Bushinwa, bikoresha izi ngufu cyane mu kubona amashanyarazi ndetse n’ibindi nka Australie bishingira ubukungu bwabyo ku mutungo kamere urimo nyiramugengeri.

Indi ngingo itari kwemeranywaho, ni ijyanye no gusaba ibihugu bikize kuvugurura intego zabyo, zikarushaho kwihutishwa ndetse no kongerwa kuko ubushakashatsi bugezweho ku mihindagurikire y’ikirere, bwerekana ko Isi itazagera ku ntego yihaye hagendewe ku ntego ibihugu byihaye magingo aya, bityo akaba ari ngombwa ko zivugururwa zikihutishwa.

Ibi ntabwo biri kwakirwa neza n’ibihugu biteye imbere biyobowe na Leta Zunze Ubumwe za Amerika ndetse n’Umuryango w’Ubumwe bw’u Burayi, byose biri kugenda biguru ntege mu kuvugurura intego zabyo, ahanini byikanga ko izi ngamba zagira ingaruka zikomeye ku bukungu bwabyo.

Indi ngingo ikomeje gukurura impaka ijyanye n’amafaranga. Mu 2015, ibihugu bikize byiyemeje gutanga miliyari 100$ ku bihugu biri mu nzira y’amajyambere mu gihe cy’imyaka itanu, aya mafaranga akaba yaragombaga kwifashishwa mu bikorwa byo guhangana n’ihindagurika ry’ikirere. Ubwo iyo myaka itanu yuzuraga umwaka ushize, ibihugu bikize byari bitaragera kuri iyo ntego, nyamara Umuryango w’Abibumbye wo wari wanasabye ko izo miliyari 100$ zakongerwa kuko zidashobora guhangana n’ibibazo byose bihari.

Ibihugu biri mu nzira y’amajyambere byagaragaje uburakari bukomeye muri iyi nama, byinubira ko ibihugu bikize byakijijwe ahanini no kwangiza ikirere, biri kugenda biguru ntege mu gufasha ibihugu biri mu nzira y’amajyambere guhangana n’ingaruka zatewe n’ibyo bihugu bikize.

Umuryango w’Abibumbye kandi wasabye ko miliyari 20$ zagenewe ibihugu biri mu nzira y’amajyambere mu 2019 mu rwego rwo gushyiraho uburyo bwo kubana n’ingaruka zatewe n’ihindagurika ry’ikirere, zikwiye gukubwa kabiri nibura kugira ngo ibihugu byinshi bitagerwaho n’ayo mafaranga bibashe kuyabona.

Byitezwe ko iyi nama iza kurangira mu mpera z’iki cyumweru icyakora hakomeje kwibazwa ku myanzuro izayiturukamo.

Ibihugu bikize biri kugenda biguru ntege mu rugamba rwo guhangana n'ingaruka z'ihindagurika ry'ikirere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .