Imiterere y’Umujyi w’agatangaza utangiza ibidukikije uri kubakwa na Singapore

Yanditswe na Ndahayo Emmanuel
Kuya 1 Gashyantare 2021 saa 11:23
Yasuwe :
0 0

Mu mwaka wa 2023, Singapore izataha igice cya mbere cy’umujyi uri kubakwa muri icyo gihugu wiswe Tengah, umujyi w’agatangaza ufite umwihariko wo kwita ku bidukikije, ndetse abahanga mu miturire ku Isi bakaba baramaze kugaragaza ko uzaba icyitegererezo cy’ahazaza h’imijyi ku Isi.

Tengah ni umujyi uzaba ugizwe n’inyubako 42 000 zubatswe mu byagereranywa n’uturere dutanu, ukazaba ari wo mujyi mushya wubatswe na Leta ya Singapore mu gihe cy’imyaka irenga 20 ishize.

Ubusanzwe, Singapore ni igihugu gito, gifite ubuso bungana na kilometero kare 728, ariko gituwe cyane, kuko gifite abatuge miliyoni 5,7.

Birumvikana ko ikibanza cyo kubakamo inzu muri Singapore kibona umugabo kigasiba undi, bityo abaturage barenga 80% bakaba batuye mu nzu rusange, zizwi nka ’apartments’.

Izo ’apartments’ zubatswe ahanini na Leta mu myaka ishize gusa ntibyaherukaga, Tengah ikaba igiye kuba icyiciro cya 24 cy’inyubako rusange zo guturamo zubatswe na Leta.

Uyu mujyi uzaba ufite umwihariko, kuko uzakemura bimwe mu bibazo icyo gihugu gisanganywe, cyane cyane mu bijyanye no kwita ku kurengera ibidukikije.

Singapore ni igihugu kishyuha cyane kandi kikagira imvura nke, ibituma abaturage bakoresha cyane ibyuma bikonjesha mu nzu zabo. Ibi byuma birakoreshwa cyane muri Singapore ku buryo ku mpuzamandengo, bitwara kimwe cya gatatu cy’umuriro ukoreshwa n’inyubako zo gukoreramo aho muri Singapore.

Ibi byuma kandi byohereza umwuka mwinshi uhumanye mu kirere, ndetse ku mpuzandengo, Singapore yohereza uyu mwuka wangiza ikirere mwinshi kurusha ibihugu bifite inganda nyinshi birimo u Bwongereza, ugendeye ku ngano y’umwuka uhumanye igihugu cyohereza mu kirere n’abaturage bagituye.

Mu gukemura iki kibazo, Ikigo cy’Igihugu gishinzwe imyubakire muri Singapore (HDB) kivuga ko mu mujyi wa Tengah hazubakwa uburyo bwo gutanga umwuka mwiza hanze y’inyubako, bitabaye ngombwa ko hakoreshwa ibyuma bikonjesha.

Ikigo gishinzwe Iteganyagihe aho muri Singapore (MSS) kivuga ko ubu buryo buzakumira umwuka wangiza ikirere ungana n’uwoherezwa n’imodoka 4 500 buri mwaka. Bavuga kandi ko ibi ari ingenzi cyane kuko ubushyuhe bukabije muri Singapore ari ikibazo gikomeye, aho MSS ivuga ko nta gikozwe, ubu bushyuhe buzaba buri ku kigero cya dogree Celecius 34.1 mu mpera z’iki kinyejana.

Muri Tengah kandi imihanda ntizajya ica ahatuwe n’abaturage, ahubwo ikazajya yubakwa ku mpande z’umujyi bityo abatuye Tengah bakazajya bakoresha amagare abandi bakagenda n’amaguru, dore ko ari umuco umaze gushinga imizi muri Singapore mu myaka itanu ishize.

Iyi mihanda kandi nayo izaba yubakanye ikoranabuhanga rigezweho, ririmo gushyirwamo ikoranabuhanga rya ’sensors’ byitezwe ko rizakoreshwa cyane n’ibinyabiziga ubwo ikoranabuhanga rya 5G rizaba ritangiye gukoreshwa cyane mu myaka iri imbere, rikazashyira mu bikorwa ibitekerezo birimo kuba imodoka zishobora kuzajya zitwara no kwirinda impanuka zirimo kugongana.

Iyi mihanda kandi izashyirwaho sitasiyo z’amashanyarazi, zizajya zikoreshwa n’imodoka zikoresha ingufu z’amashanyarazi. Imodoka kandi na zo zizajya ziparikwa munsi y’ubutaka, ku buryo hejuru yabwo hagenda abantu n’amagare kurusha ibindi.

Mu bice bihuriramo abantu benshi, umujyi wa Tengah uzashyirwamo amatara afite ikoranabuhanga rituma yaka igihe hateraniye abantu, akanizimya igihe nta bantu bahari, mu rwego rwo kwirinda iyangirika ry’umuriro ritari ngombwa.

Imyanda izajya ikoreshwa n’abatuye Tengah, ntabwo izajya itwarwa n’imodoka iyikuye kuri buri nyubako nk’uko bimeze muri myinshi mu mijyi yubatswe aho muri Singapore. Abashushanyije uyu mujyi bagennye ko imyanda y’inyubako zitandukanye izajya ihurizwa ahantu hamwe, hazajya haba hari ikoranabuhanga rishobora kubwira imodoka zitwara imyanda ko yamaze kuba myinshi ku buryo ziza kuyitwara.

Abatuye muri iyi mujyi kandi bazahabwa porogaramu yo gushyira muri telefoni (application) izajya ibabwira ingano y’amazi n’umuriro bamaze gukoresha, ndetse ikanabereka muri rusange uko bafata neza ibidukikije mu gice batuyemo.

Ikigo gishinzwe guteza imbere ibidukikije aho muri Singapore, kikavuga ko ibi bigamije guha abaturage amahirwe yo kumenya uko bakoresha amazi n’umuriro ku buryo bashobora kumenya igihe cyo kugabanya ibyo bakoresha, byose bigamije kubaha amahirwe yo guteza imbere ibidukikije.

Ku rundi ruhande, Tengah ni umujyi uzaba utamirijwe n’amashyamba impande zose, ibyo Perrine Hamel, umwalimu w’Ishami ry’Ibudukikije muri Kaminuza y’Ikoranabuhanga ya Nanyang, avuga ko bizatuma abantu barushaho kwita ku bidukikije kuko "hari ingero nyinshi ku Isi hose zerekana ko uko abantu bahura n’ibidukikije cyane ari na ko barushaho kubyitaho".

Tengah izubakwa ku buso bwa hegitare 700 kandi ab’inkwakuzi bamaze kwibikaho inzu zabo aho imwe y’ibyumba bibiri izajya ikosha ibihumbi 82$ (arenga miliyoni 81 Frw). Ubuyobozi bwa Singapore bwari buherutse kumara impungenge abavugaga ko ubuto bw’igihugu bushobora kuzagira ingaruka ku miturire mu gihe kiri imbere, gusa bo bakavuga bafite ubushobozi bwo gutuza mu gihugu abantu barenga miliyoni 10 kandi u buryo bwiza.

Imijyi myinshi yubatswe muri Singapore yubatswe ikoranabuhanga ririho ubu rikiri inzozi, cyangwa ritaratekerezwaho, ku buryo iyo mijyi bigoye kuyihindura mu gihe gito. Abahanga mu by’imiturire bavuga ko Tengah ari ishusho y’uburyo imijyi y’ahazaza izaba imeze, hashingiwe ku guteza imbere ibidukikije nka kimwe mu bibazo bikomereye Isi muri ibi bihe.

Ni umujyi uzaba wubatsemo ibiyaga
Nta modoka nyinshi zizajya zitembera hagati mu mujyi, hazajya hakoreshwa amagare n'amaguru cyane
Ni umujyi ukikijwe n'amashyamba
Uyu mujyi ubaza icyitegererezo cy'imijyi y'ahazaza
Uburyo bwo gukusanya imyanda muri uyu mujyi buzaba bugezweho
Igishushanyo mbonera cy'uyu mujyi uturutse mu kirere
Usibye izi nyubako zo guturamo, hazaba hari ahagenewe ibindi bikorwa birimo ubucuruzi
Ni umujyi ugezweho cyane
Abinkwakuzi batangiye kugura inzu muri uyu mujyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .