Ikiganiro mpaka hagati ya Trump na Clinton cyaciye agahigo kirebwa na miliyoni 84

Yanditswe na Philbert Girinema
Kuya 28 Nzeri 2016 saa 11:35
Yasuwe :
0 0

Ikiganiro mpaka hagati ya Donald Trump na Hillary Clinton, abakandida babiri bahatanira umwanya wa Perezida wa Leta Zunze Ubumwe za Amerika, cyaciye agahigo ko kurebwa n’abantu miliyoni 84, ibintu byaherukaga kubaho mu myaka 36 ishize.

Aba bantu miliyoni 84 ni abakurikiranye iki kiganiro cyabaye tariki 26 Nzeri 2016, kuri shene 13 zo muri Amerika zagikicishijeho ubwo cyabaga.

Agahigo nk’aka kaherukaga kubaho mu 1980, ubwo ikiganiro mpaka hagati ya Jimmy Carter na Ronald Reagan cyarebwaga na miliyoni 80.6.

Urubuga Nielsen rwakusanyije iyi mibare ruvuga ko aba bantu uko ari miliyoni 84 bakurukiranye iki kiganiro mu minota 98 cyamaze kandi ko iyi mibare ishobora kurenga kuko hari n’abandi benshi hirya no hino ku isi bakirebye binyuze kuri Internet n’ahandi hantu hatandukanye.

Ku wa Kabiri Trump, uhagarariye ishyaka ry’aba- Républicains yabwiye abamushyigikiye ko yari abizi neza ko iki kiganiro mpaka kizarebwa n’abantu benshi mu mateka ya televiziyo ariko na none agaragaza ko yababajwe n’uko Lester Holt wari ukiyoboye atabajije Clinton ku makosa yakoze arimo kubika ubutumwa bw’akazi kuri mudasobwa ye bwite.

Ni mu gihe Clinton we yemeza ko hagaragaye itandukaniro hagati ye na Trump, akavuga ko abantu ubwabo bashobora kwifatira umwanzuro bakurukije uko yitwaye.

Ubushakashatsi bwakozwe na CNN nyuma y’iki kiganiro mpaka bwagaragaje ko 62% byabagikurikiranye basanga Clinton yitwaye neza mu gihe abanyuzwe na Trump ari 27%.

Ku itariki ya 9 na 19 Ukwakira 2016 hateganyijwe ibindi biganiro mpaka hagati y’aba bakandida bombi.

Amatora muri Leta Zunze Ubumwe za Amerika ateganyijwe kuba tariki 8 Ugushyingo 2016.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza