00:00:00 IGIHE NETWORK KN KINYARWANDA EN ENGLISH FR FRANCAIS

Ikiganiro cya Biden na Xi Jinping gisobanuye iki ku mubano wa Amerika n’u Bushinwa?

Yanditswe na Bukuru JC
Kuya 16 Ugushyingo 2021 saa 06:41
Yasuwe :
0 0

Mu kiganiro cy’amasaha atatu cyabaye mu buryo bw’ikoranabuhanga, Perezida Xi Jinping w’u Bushinwa yaganiriye na mugenzi wa Amerika, Joe Biden, amuhishurira ko gushyigikira ukwigenga bwa Taiwan ntaho bitaniye no gukina n’umuriro.

Ni ikiganiro cyabaye mu gihe ibihugu byombi bifite byinshi bitumvikanaho muri iyi minsi, birimo ikibazo cya Taiwan na Hong Kong, ibihano mu by’ubucuruzi buri gihugu cyafatiye ikindi, inkomoko ya Covid-19, ingamba zo guhangana n’ihindagurika ry’ikirere n’ibindi.

Abasanzwe bakurikirana iby’umubano w’ibihugu byombi, barimo Stephen McDonnell uhagarariye BBC mu Bushinwa, bavuga ko impande zombi zimaze kubona ko ziri guhombera mu kutumvikana, ku buryo gushyira hamwe bishobora kuzana inyungu ku mpande zombi kurusha guhangana.

Icyakora abandi barimo Fang-Yu Chen wigisha muri Kaminuza ya Soochow University iri mu gace ka Taiwan, yavuze ko ibi biganiro nta kinini bisobanuye kuko bigoye ko uruhande urwo ari rwo rwose rwahindura uburyo rufata urundi.

Ati "Barimo kugerageza kumvikana no gusobanukirwa buri ruhande, nubwo gahunda buri gihugu gifite ku kindi itazahinduka mu gihe cya vuba. Biden yabivuzeho igihe kinini ndetse na raporo za Pantagon zisobanura ko Amerika ikwiriye kuvuza u Bushinwa kwigarurira Taiwan hakoreshejwe intambara. Biragaragara ko Amerika ihangayikishijwe na Taiwan."

Mu munsi ishize, Perezida Biden yavuze ko mu gihe u Bushinwa bwatera Taiwan, icyo gihugu gishobora kujya ku ruhande rwayo.

Muri iki kiganiro, Biden yahaye ikaze mugenzi Jinping, amubwira ko nk’abayobozi b’ibihugu by’ibihangange, bafite inshingano yo kwirinda ko ihangana mu by’ubukungu, ikorabuhanga n’izindi nzego ridakwiye kuba intandaro y’amakimbirane.

Yavuze kandi ko ibihugu byombi bikwiye gukora iyo bwabaga mu guhangana n’ikibazo cy’iyangirika ry’ikirere, ndetse hagashakwa umuti ku bindi bibazo byugarije Isi.

Kuri iyi ngingo, Jinping yavuze ko ari ngombwa ko Amerika n’u Bushinwa bikorana mu kurushaho gukemura ibibazo bireba Isi muri rusange, birimo iby’ihindagurika ry’ikirere, iterabwoba, ingaruka za Covid-19 n’ibindi bitandukanye.

Icyakora nk’uko byari byitezwe, Jinping yakoresheje uyu mwanya mu kongera kuburira “Inshuti ya kera,” abwira Biden ko imyitwarire ya Amerika mu kibazo cya Taiwan, aho icyo gihugu gishyigikiye ubwigenge bwayo, “Ari nko gukina n’umuriro.”

U Bushinwa buvuga ko agace ka Taiwan ari akabwo, mu gihe Amerika ivuga ko ari agace kigenga gakwiriye kurekerwa ubusugire bwako.

Perezida Jinping ntiyigeze na rimwe ahisha amarangamutima ye kuri iyi ngingo, aho yavuze ko intego ari ukugira u Bushinwa igihugu kimwe, harimo na Taiwan, ibi bikazaharanirwa binyuze mu mahoro cyangwa mu bundi buryo burimo ubw’intambara.

Ku rundi ruhande, mu minsi ishize hamenyekanye amakuru avuga ko ingabo za Amerika zimaze igihe muri Taiwan mu buryo bwa rwihishwa, aho ziri gutoza ingabo z’ako gace kugira ngo mu gihe u Bushinwa bwagatera, zizabashe kwirwanaho, uretse ibi bigoye cyane ugereranyije n’ubushobozi bw’igisirikare cy’u Bushinwa.

Perezida Xi Jinping yihanangirije mugenzi we wa Amerika, amusaba kutivanga mu kibazo cya Taiwan

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .