Kwamamaza

Ijambo rya Donald Trump nyuma yo gutsindira kuba Perezida wa 45 wa Amerika

Yanditswe kuya 9-11-2016 saa 18:20' na Cyprien Niyomwungeri


Nyuma yo gutsindira kuyobora Leta Zunze Ubumwe za Amerika nka Perezida wa 45, Donald Trump, yavuze ijambo rikomeye ashimangira ko yiteguye kuba Perezida w’abaturage bose ba Amerika yaba abamutoye n’abatamutoye, kandi agiye gukora amateka akazahura igihugu mu ngeri zinyuranye.

Intsinzi y’uyu muherwe yamenyekanye nyuma yo gutsinda muri Leta ya Pennsylvania akagira amajwi 274 kuri 215 ya Hillary Clinton bari bahanganye.

Ijambo rya Trump nkuko CNN yarishyize ahagaragara

“Murakoze. Murakoze cyane mwese, mumbabarire gutuma mukomeza gutegereza ibintu bikomeye, mwakoze cyane.

Nahamagawe n’Umunyamabanga Clinton, aradushimira. Ni ku ntsinzi yacu, ndamushimira n’umuryango we ku bikorwa byo kwiyamamaza bikomeye bakoze.

Ndashaka kuvuga ko yahanganye bikomeye, Hillary yahanganye cyane kandi igihe kirekire ndetse tumugomba ishimwe ry’akazi gakomeye yakoreye igihugu cyacu.

Ndashimangira ko ubu ari igihe ngo Amerika ice ivangura, dushyire hamwe. Yaba Aba- républicain cyangwa Aba- démocrate bose aho bari mu gihugu, ndabivuze ni igihe cyo gushyira hamwe nk’umuntu umwe.

Ni igihe.Nsezeranyije buri muturage w’igihugu cyacu ko nzaba Perezida w’Abanyamerika bose, iki nicyo cy’ingenzi kuri njye. Abatarahisemo kunshyigikira ahashize, abo bari bake nzumva umurongo wanyu nemere n’ubufasha bwanyu kugira ngo dukorere hamwe twunge igihugu cyacu cyiza.

Nkuko nabivuze kuva mbere, twebwe ntabwo twiyamamazaga ahubwo twakoraga ibidasanzwe dufatanyije n’amamiliyoni y’abagabo n’abagore bakora cyane, bakunda igihugu cyabo kandi bashaka kukigira cyiza, bashaka ahazaza heza kuri bo no ku bana babo.

Ni urugamba rwarimo abanyamerika bo mu moko yose, amadini yose, bafite amateka n’imyemerere bitandukanye, bashakaga kandi bari bizeye gukorera abaturage bagendeye ku byifuzo byabo.

Gukorera hamwe, tuzatangira urugamba rw’ingenzi rwo kongera kubaka igihugu cyacu no kuzahura inzozi z’Abanyamerika. Igihe kinini cy’ubuzima bwanjye nakimaze mu bucuruzi nita ku mishinga ifitiye akamaro abaturage bose ku Isi.

Iki nicyo nshaka gukorera igihugu cyacu. Ibyiza bishoboka kugira ngo igihugu kimere neza, buri munyamerika azagira amahirwe yo gushyira mu ngiro indoto ze. Abagabo n’abagore birengagijwe mu gihugu cyacu ntibazongera kwibagirana ukundi.

Tugiye kuvugurura imijyi yacu twongere twubake inzira za gari ya moshi, ibiraro, inzira zo munsi y’ubutaka, ibibuga by’indege, amashuri n’ibitaro. Tugiye kongera kubaka ibikorwa remezo byacu aho bitari biri kandi bizatanga imirimo ku mamiliyoni y’abaturage bacu.

Tuzita ku bantu bari mu kiruhuko cy’izabukuru babaye abizerwa kandi namenye benshi muri uru rugendo rw’amezi 18. Igihe namaranye na bo muri ibi bikorwa byo kwiyamamaza ni kimwe mu bintu by’agaciro nabonye. Abasaza bacu ni abantu badasanzwe.

Tuzashyira imbere umushinga wo guteza imbere igihugu no kukizahura. Nzita ku mpano z’abaturage bacu kandi byose bigamije kubabyarira inyungu.

Dufite igenamigambi ry’ubukungu rikomeye, tuzakuba kabiri iterambere ryacu kandi tugire ubukungu bukomeye cyane ku Isi yose. Tuzabihuza no gukorana n’ibihugu byose bibyifuza, tuzagirana umubano mwiza turabyiteguye. Nta nzozi zidashoboka, nta nzitizi zikomeye. Ntacyo twifuza tutageraho.

Amerika ntizongera kugira icyo ikora kitari icyiza, tugomba gusubira ku cyerekezo cyacu n’inzozi zacu. Tugomba kubikora, tugiye gutekerereza igihugu cyacu ibintu byiza kandi by’iterambere.

Ndashaka kubwira Isi yose ko nubwo dushyira inyungu za Amerika imbere, tuzakorana na buri wese mu bwubahane, yaba buri wese na buri gihugu cyose. Tuzaharanira inyungu rusange atari uguhangana, duharanire ubufatanye atari amakimbirane.

Ubu ndashaka gufata uyu mwanya ngo nshimire buri wese wamfashije kugera kuri ibi, ibyo barimo kwita muri iri joro intsinzi y’amateka.

Mbere na mbere ndashaka gushimira ababyeyi banjye nzi ko bandeze kugeza ubu, ni abantu bakomeye, nabigiyeho byinshi, muri buri cyose baratangaje. Mu by’ukuri ni ababyeyi batangaje. Ndashimira kandi bashiki banjye Marianne na Elizabeth, bari kumwe natwe muri iri joro, bari hehe, bari hano ahantu runaka, barajunjamye mu by’ukuri.

Melania, Don, Ivanka, Eric, Tiffany na Barron, ndabakunda kandi ndabashimira by’umwihariko kubana natwe ya masaha yose. Ibi ni byiza.”

[Trump yakomeje ashimira n’abandi bantu benshi yarondoye amazina n’abo atarondoye.]

“Byari amateka ariko tugomba gukora akazi keza kandi mbasezeranyije ko ntazabatetereza. Ntegereje kuba Perezida wanyu kandi ndizera ko nyuma y’umwaka umwe, ibiri, itatu, ine ndetse n’umunani muzavuga muti hari byinshi wadukoreye.

Reka mvuge ngo ubwo kwiyamamaza n’amatora birangiye, ubu akazi kacu muri uru rugamba nibwo gatangiye. Tugiye gukorera abaturage ba Amerika kandi tugakora akazi kazatuma baterwa ishema n’uko ndi Perezida wabo. Muzanyishimira, nanone ndabyishimiye.

Ni umugoroba utangaje, ni igihe cy’imyaka ibiri itangaje kandi nkunda iki gihugu.

Murakoze.

Murakoze cyane. Urakoze Mike Pence”

Trump yashimiye abantu bose bamufashije kugeza atowe

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved