Icyogajuru cya UAE kigiye kwinjira mu kirere cya Mars

Yanditswe na Ndahayo Emmanuel
Kuya 9 Gashyantare 2021 saa 10:05
Yasuwe :
0 0

Icyogajuru cyiswe ’Hope’ cyoherejwe na Leta Zunze Ubumwe z’Abarabu (UAE), kigiye kwinjira mu kirere cy’Umubumbe wa Mars, aho kizakora ubushakashatsi buzarushaho gufasha abantu kumenya byinshi kuri uwo mubumbe.

Iki cyogajuru cyahagurutse ku Isi mu mezi arindwi ashize, gifite intego ikomeye yo kujya kwiga ikirere cy’Umubumbe wa Mars. Biteganyijwe ko kuri uyu munsi kiri bwinjire muri icyo kirere, n’ubwo ari urugendo rutoroshye kuko rusaba ubwitonzi buhambaye, nk’uko bitangazwa na Omran Sharaf ukuriye uyu mushinga wo kugeza Hope kuri Mars.

Yavuze ko bari gusuzuma umuvuduko w’iki cyogajuru kuko ubaye mucye cyagwa kuri Mars, waba mwinshi kikayirenga, kandi icyo bashaka ari uko kiguma mu kirere cy’uyu mubumbe.

Yagize ati "Turi kwinjira mu gice cy’ingenzi cyane. Ni igice kizatwereka niba tuzagera kuri Mars cyangwa bitazashoboka, kizatwereka niba tuzahakorera ubushakashatsi cyangwa bitazakunda. Nitugenda gahora cyane, turaza kugwa kuri Mrs, nitwihuta cyane, turarenga Mars".

Abashakashatsi b’ikigo cya ’Mission control at the Mohammed bin Rashid Space Center’ (MBRSC), ari na cyo cyohereje iki cyogajuru mu kirere, bavuga ko bizeye ko ibintu byose biza kugenda neza, gusa nanone ngo mu gihe bitagenda neza, bateguye uburyo bwo kugabanya ingaruka byateza.

Iki cyogajuru nikiramuka cyinjiye mu kirere cya Mars neza, kizatanga amakuru y’ingenzi cyane arimo imiterere y’ikirere cyaho n’uko ibihe bisimburana. Bazareba kandi umukungugu uri kuri Mars n’amakuru ushobora kuba ubitse ajyanye n’amateka y’uwo mubumbe, ndetse banige ibijyanye n’ubushyuhe buri kuri uwo mubumbe muri rusange.

Bazaniga kandi impamvu umubumbe wa Mars udafite amazi kandi asa nk’ayigeze kuhaba, banafate amafoto yegereye uwo mubumbe kurusha ayari asanzwe akoreshwa.

Leta Zunze Ubumwe z’Abarabu ziteganya ko itsinzi y’uyu mushinga ishobora gutuma urubyiruko rwinshi rushamadukira kwiga amasomo y’ubuhanga na siyansi, bityo iki gihugu na cyo kikazagira inararibonye zihagije mu gihe kiri imbere zizagifasha kugira uruhare mu bikorerwa mu isanzure, ryamaze kugaragazwa nk’irizaba isibaniro ry’ibihugu mu myaka iri imbere.

Kugeza ubu, kuko ubumenyi bw’abahanga ba UAE ari bucye, kuko iki gihugu cyinjiye mu byo kwiga isanzure mu mwaka wa 2009 ubwo cyoherezaga satellite ya mbere mu kirere, bari gukorana na kaminuza zo muri Leta Zunze Ubumwe z’Amerika ndetse na NASA mu rwego rwo kugira ngo bagere ku ntego zabo.

Muri ya ntambara yo kusiganwa mu bushakashatsi bw’amakuru y’isanzure, byitezwe ko muri uku kwezi nta gihindutse, ibihugu birimo u Bushinwa na Amerika bigeza ibindi byogajuru kuri Mars, mu rwego rwo gukomeza guteza imbere ubushakashatsi kuri uwo mubumbe.

Icyogajuru cya Hope kigiye kwinjira mu isanzure rya Mars

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .